《伙記唔該落單》: 序章「我」

是咁的，我叫梁嘉杰，係一個普普通通嘅大學生，只係比較mk，比較靚仔。

由細到大都比人問我係咪同嗰個乜鬼立法會議員有關係，我心諗識佢老鼠咩，我呢個名喺旺角求其跌個招牌落嚟都砸死幾個啦。

十五歲就冇讀書，群左堆黑社會，有次喺波地同對面字頭開片，隨手喺地下擸咗枝木棍扑到條友爆缸，入男童院踎咗兩年，出返嚟比啲姑娘逼我去考大學，唔係啲姑娘叫做幾靚女，又請我食波餅嘅話真係睬你都有味。

老豆老母喺我七歲嗰陣就離咗婚，我老豆返咗大陸同阿嫲住，老母喺兩年前仲去咗賣鹹鴨蛋，所以得返婆婆喺身邊架咋，不過我好錫佢，佢都好錫我。

如果佢都行埋真係唔知點算。



讀緊某間大學嘅水泡科，唔好問我點入大學，因為我都唔知，總之就係咁啱夠分而佢又收咪入到囉。

兩年前入大學比人昆咗去玩嗰個咩系會迎新營，結果比咗五舊水Camp Fee之後呢，除咗有得飲酒係叫開心啲之外，嘩屌我以為啲活動係比小學生玩。

攞命嘅係完咗個Camp之後嗰啲咩組爸組媽成撚日問我RE唔REU，我真係屌你咩，你估你棒棒堂相隔多年再次合體呀？

「阿杰，去唔去REU呀？」

「食飯就食飯啦，RE你老味。」



最戇鳩係成日比同組個肥婆煩我。

「阿杰，可唔可以同我睇戲呀！」

「而加睇都得。」

「下？真嘅？！」

「睇空氣呀死肥婆，彈開啦屌。」



我知自己靚仔，有邊啲女唔鍾意我呢啲放蕩不羈嘅類型，但都唔洗隔幾日就問我睇唔睇戲掛。

因為由細到大把口都唔收，嚇走曬啲人，結果到而加一個老友都冇，唔係有婆婆喺度嘅話，真係孤伶伶。