今日係星期五,所以學校day off,但係我同咗嫻姐講今日唔返工,因為要陪婆婆。

朝早八點幾我就醒咗,見到婆婆唔喺床,但廁所有水聲,即係婆婆洗緊頭,見未用得廁所,我就出咗後樓梯食煙。

食完煙返入屋,婆婆就坐咗喺梳化。

「乖孫..咁早呀...」

「係呀,今日唔洗返工,諗住陪下你。」



「頭先出咗去食煙呀...」

「呃..係呀婆婆。」

婆婆其實知我食煙,不過我唔想俾佢見到。

「喺屋企食都得架...」

我笑咗笑,捉住咗婆婆隻手,望咗佢個樣一陣,我就入咗廁所刷牙同埋沖涼。



九點幾左右,我就叫婆婆換衫,諗住同佢落去碧湖花園間酒樓飲茶。

「兩位。」我扶住婆婆同個經理講。

「等等呀...兩位入嚟呢邊呀。」

我同婆婆坐低咗之後,我就拎咗張點心紙嚟睇,順便問下婆婆想食咩。

「婆婆,有冇咩想食呀。」



「冇所謂呀...你想食就叫啦....」

婆婆真係得意,於是我就係咁易叫咗碟腸粉、叉燒包同埋白焯生菜。

呢個時候,有一個坐喺隔離嗰檯嘅伯伯,笑笑口咁望住我同婆婆。

「早晨呀!你個孫呀?」

「係呀...」婆婆話。

「咁大個拿...真係乖喔..陪老人家飲茶...」

我尷尷尬尬咁點咗下頭,就繼續等嘢食。

過咗一陣,啲點心開始上,我就夾比婆婆。



「婆婆,食條菜啦。」我微微笑住咁講。

「嗯...乖孫...」

婆婆食嘢呢個樣,我諗已經係一生人之中最大嘅動力,只要諗起婆婆,我就知道我唔可以懶散,讀書係,返工都係。

為咗婆婆,我真係可以咩都唔要。

「食飽未呀乖孫...」

「我飽喇,你呢?」

「嗯...食飽啦...」於是我幫婆婆抹一抹嘴。



之後我就同婆婆去街市買餸,順便行下。

「今晚想食咩呀?」我問婆婆。

婆婆笑一笑,跟手就指住冰櫃入面嘅雞翼。

「想食雞翼?今晚煎比你好唔好?」

「好..梗係好啦..乖孫煮嘅..咩都好...」

又搞到我有啲眼濕濕,不過我忍住咗。

買完餸之後,我就一隻手拎住啲餸,一隻手拖住婆婆。

「婆婆,同你去華明嗰邊坐下。」



我拖住婆婆,同佢慢慢咁行去公園,雖然我又mk又串,但係我好錫婆婆,無論佢行得幾慢,我都唔會放手,會一直陪住佢行。

「乖孫..以前你細個呀..成日響度踢波...」婆婆指住華明街市隔離個五人足球場。

「哈哈,係呀,以前成日踢到夜一夜先返。」

就算我以前真係群住班黑社會,但有時都會喺呢個球場踢波。

我哋就咁坐咗喺公園嘅長櫈,坐咗兩個鐘,不過我唔會有怨言,因為我知老人家係鍾意坐喺張長櫈,然後咩都唔做。

而且有得陪婆婆,我已經心滿意足。

「返去喇!」我望一望婆婆。



於是我就扶起婆婆,慢慢拖住佢返華心邨。

晏晝睇下電視,夜晚煮下飯,咁就一日。

平時放假,我嘅生活就係咁,好平淡,冇其他同齡後生仔咁多姿多彩。

不過,對我嚟講,已經足夠喇。