啊...好攰,唔想起身。

「咁早嘅....」婆婆坐喺木櫈上面睇緊新聞。

「係呀,今日要返工呀。」我坐起身笑住咁話。

「哦...小心啲呀...」

「知道喇婆婆。」



我見婆婆坐緊木櫈,就即刻起身,讓咗張梳化比佢坐,等婆婆唔洗咁辛苦。

其實朝早可以見到婆婆,我就好開心。

因為我知道,婆婆係我唯一嘅親人。

至少婆婆會關心我。

老豆?冇咗影好耐。



「我出去喇。」我俾咗二百蚊婆婆,叫佢買啲嘢食,之後就返工。

今日沛霖佢地三個又嚟咗,又坐喺收銀隔離嗰張圓枱。

不過我已經見怪不怪,可能係習慣咗呢三個女仔嘅存在。

「食咩呀今日。」

「你心情好似幾好咁。」沛霖問我。



「係?點解咁講。」

「起碼對住我唔惡先!」

我望住呢個女仔,笑咗一笑。

「咁你諗好食咩未。」

「um...我要A餐,熱檸水。」

「我同嘉瑩要C餐,兩杯熱華田。」

「得,收到。」

俾完張單雄哥,我又挨咗喺收銀。



「喂,杰仔。」沛霖又叫我杰仔,但係我已經懶得再去話佢,既然沛霖鍾意咁叫,咪由佢咁叫,冇所謂。

「做咩。」

「有冇睇到張單?」沛霖問我。

張單?哦,寫住電話號碼嗰張。

「有呀,見到一堆數字。」

「咩數字呀!我個電話嚟架。」挑,我夠知。

「你寫個電話上去做咩。」



呢個時候沛霖呆咗呆,敏怡就話。

「哎!佢話唔敢直接俾個電話你,就話不如寫喺張單度,又唔洗親自講出口,又好似浪漫咁啲喎~」敏怡笑笑口咁講。

我好無奈咁望住沛霖,沉默咗幾秒。

「其實,你想俾電話我。」

「直接講都得嘅。」

唔知點解會講埋曬呢啲嘢,可能真係心情好。

沛霖望住我,面上露出一個微笑。

「咁..你今晚可唔可以搵我...」



乜而加啲女咁主動,識咗一個月都冇。

不過諗返起學校成日搵我睇戲嗰個肥婆,瞬間覺得沛霖算係幾正。

「伙記!寫嘢!」

我望一望沛霖,就話。

「睇下點。」

做到五點幾,我見冇乜客,就叫子彈同我出去食煙。

「有冇諗住搵人。」子彈問我。



「乜你頭先睇到曬?」

「好難睇唔到啫。」

屌,呢個子彈真係。

「唔知喎,睇下點先啦。」

「我又唔係對佢有意思。」

「但又唔係完全冇意思呀嘛。」子彈戚咗一戚條死人眉,搞到我想郁鳩佢。

「我似啲咁易對女仔動心嘅人?」

「你梗係唔似,因為你直頭係。」

唉屌你去食屎。

突然,有人打比我。

冇冧把嘅,唉照聽咗先。

「喂邊位。」

「呀杰...嗚..你...係咪呀杰...」

仆街,無啦啦有個女人喊住打嚟嘅喂。

「係...你係?」

「我..我..係雪寧呀...」

雪寧?唔撚係掛。

「搵..搵我有咩事。」

「今晚得唔得閒...可唔可以陪我...」

「下..但係...」

「喂,有客要寫嘢呀。」雄哥大叫出嚟。

「我要做嘢,一陣打比你,拜。」

跟住我就cut咗佢線。

「講到口窒窒咁嘅你,頭先邊個打比你。」子彈問我。

「以前條女。」

「佢冇事嘛?」

我搖搖頭。

做到八點,終於收工,我啱啱喺褲袋拎部電話出嚟,就有人打比我。

「喂?」

「呀杰...係我呀...」屌,唔記得打返比雪寧。

「頭先做嘢太忙,唔記得打返比你,sorry。」

「唔..唔緊要..係呢...夜啲出嚟太子得唔得...」

唔洗問呀貴,九成九又係失戀。

因為之前已經試過兩次。

「我要返去陪婆婆,幫你唔到。」

「唔好咁啦...就當..就當係可憐下我...」

佢出到「可憐」呢兩個未嘅時候。

我知我已經走唔甩。

屌,對住女人我真係冇曬乎。

「得得得,夜啲搵你,係咁。」

我拎咗啲嘢食返屋企,就同婆婆食嘢。

十點左右,我等婆婆瞓著,就出咗太子。