《伙記唔該落單》: 第二十六章「重新長大」

婆婆離開咗都一段時間，我嘅生活都要回復正常，雖然有時都會諗起，但唔可以俾負面情緒影響到自己。

總要習慣，習慣冇咗婆婆嘅生活。

係咪？

啱啱開始sem break，所以我可以日日返工。

「喂，早晨。」



「早晨呀杰少。」子彈拍一拍我。

「做咩咁樣望住我。」

「呃...你冇事喇下嘛？」

「冇事啦，都要好好哋生活。」

「呼，你識諗就好，我同雄哥好驚你亂諗嘢做傻事。」子彈鬆一口氣，然後笑咗笑。



「屌，得啦我冇嘢。」

做完早餐，就到午市。

又要忙一大輪。

「呢幾日唔見佢哋三個嘅？」子彈問。

「哦...沛霖whatsapp我話佢哋開始放聖誕假，唔洗返學喎...」



「係喎屌...而加中學放緊假，唉我呢啲老嘢離開咗學校咁耐，已經唔記得咗學校假期呢樣嘢。」

「挑..死老嘢。」我笑一笑，就去咗做嘢。

又忙完一大輪，我就出咗去食煙。

「嘶.......呼.......」

嗞，嗞嗞，嗞，嗞嗞。

「喂？」

「係我呀！有冇掛住我呢！」

「冇喎，呵呵。」



「哼正衰人，係呢你三十一號得唔得閒呀。」

「三十一...好似要返工喎。」

「下..除夕都返工...」

「做咩，想約我？」

「係呀想見下你囉，費事你一個人過咁慘啦！」

「我要返工喎...」

「咁呀，一係你收工之後我嚟搵你！」



呢個傻妹，究竟有幾想見到我。

「好，實好架。」

反正我話唔好，佢都會過嚟，慣了哈哈。

「咁就三十一號見架喇喎！」

「嗯，你鍾意就得啦。」

「咁..你呢...你鍾唔鍾意..？」

我窒咗下，因為我估唔到沛霖會咁問我。

「噗，講笑講笑。」沛霖又補返句。



「我要做嘢喇。」

「嗚...好啦！夜晚再搵你！」

唔知由幾時開始，已經習慣咗佢會係咁煩我。

呢兩日見唔到佢，反而有啲心不在焉。

「唔理，都係做嘢先。」

夜晚六點幾嗰陣，有幾個西裝友喺門口行嚟行去，又望住鋪頭入面，唔知做乜。

「係咪食嘢？入嚟坐。」子彈行咗過去問。



之後嗰幾個西裝友微微笑住搖一搖頭。

隔咗陣就走咗。

奇奇怪怪。

收工之後，我買咗個老麥返屋企，自從做咗麵檔，都好耐冇食過呢啲油炸嘢。

得閒食下都唔錯。

食到一半，沛霖突然whatsapp我。

「聽晚敏怡話去飲嘢 你嚟唔嚟呀」

飲嘢？你夠十八歲未架。

「做咩無啦啦飲嘢」

「佢話考完試慶祝下喎」

我去嘅話應該會dead air，還是不了。

「唔啦 你哋去」

「佢話聽晚去聯和墟飲 好近咋喎嚟啦」

「到時得閒咪嚟btw你識飲酒？」

「飲過jolly sandy」

..........我真係唔知點應佢好

「酒吧啲酒唔係jolly sandy 你得唔得架」

「你關心我呀？」

.....................

「總之你睇住啦 咪飲咁多」

之後佢就冇覆我，應該有嘢忙緊。

我食完個老麥，沖完涼就攤咗上梳化。

雖然而加有張碌架床俾我瞓，但我始終都係瞓慣梳化，叫我去瞓床，未必適應到。

嗞，嗞嗞。

「喂。」

「喂杰少，聽晚收工去唔去睇波。」

「睇咩，歐聯？」

「係呀十六強，利記鬥車仔。」

「是但，邊到睇。」

「聯和pacific。」

又聯和墟，突然咁多人去聯和墟嘅喂。

「好。」

唔知會唔會撞到沛霖。

有少少掛住佢。

拿。

係少少咋。