《伙記唔該落單》: 第四十四章「動地驚天愛戀過」
「其實你有幾了解沛霖？」
呢一個問題，突然令到我窒咗下。
「我...有幾了解沛霖...？」
「係呀，雖然聽沛霖講你哋成日見，但你又知道佢幾多嘢？」嘉瑩雙手抱胸，側起頭望住我。
自以為同沛霖好親近嘅我，一時之間竟然答唔到嘉瑩嘅呢條問題。
「係咪答唔到？」嘉瑩見我十幾秒都未出聲，就問我。
「係...」我只好無奈地點點頭。
嘉瑩嘆一嘆氣，然後就對我講。
「你哋一齊嘅時候可能好開心，但係你有冇嘗試去了解下沛霖內心真正嘅想法？」
「我知道沛霖好鍾意你，我唔知你點諗啦，但我同敏怡都唔想睇住好朋友俾個男仔傷害。」
但係，我已經傷害咗沛霖。
「嗯...我從來都冇試過企喺沛霖嘅角度，去睇我哋之間嘅關係..」
「我淨係覺得同沛霖一齊嘅時候好開心，好享受同佢一齊玩嘅時間。」我抬高頭，望住停車場外嘅馬路。
「呢個就係你哋嘅問題，可能你身邊好多女仔，但沛霖唔係，佢淨係得你一個，佢咩都俾曬你咁濟。」
「我...我知道自己...好自私。」
「如果你真係對沛霖有意思，可唔可以似返個男人，應承返沛霖想你做嘅事，然後多啲關心佢，唔好當佢係玩具好冇？」
我從來都冇當沛霖係玩具...
「嗯...我..我會試下...」
「試？而加唔係要你試。」
「係承諾。」嘉瑩皺起眉頭望住我。
承諾...我做到嗎？
但係為咗再見沛霖一面，我點都要盡力去做。
嘉瑩講得啱，沛霖咩都俾曬我，為我做咗好多嘢，但我只係當佢嘅付出，係理所當然。
我就係咁自私，以前嘅雪寧係咁，而加沛霖都係，我只係做自己鍾意做嘅事，完全冇考慮過佢哋嘅感受，最後受傷嘅，只係佢哋。
「我..我會....搵個機會同沛霖講...」
「沛霖佢...佢幾時會返嚟..」
嘉瑩諗咗幾秒，之後就望住我。
「唔知。」
「聽沛霖講，完全康復嘅機會只有五成，如果醫唔返，佢下半世就要一直食藥。」
「係..係呀....」
我垂低頭。
我真係好憎自己。
梁嘉杰，你可唔可以似返個男人。
「不過咁。」
嘉瑩嘆一嘆氣，然後搭住我膊頭。
「你唔洗太擔心啦，沛霖會吉人天相。」
「而且你唔洗驚以後都見佢唔到。」
「點..點解咁講？」
「因為沛霖好鍾意你囉。」
「佢好返之後，一定會返香港搵你。」
呢一日返到屋企，我諗咗好多嘢。
我望住沛霖嗰張whatsapp icon，突然發現，其實沛霖同我相處嘅時候，同我講嘅嘢，字裡行間都透露咗唔少佢自己內心嘅想法。
「你同我去唱k，我就唱俾你聽。」
我點解察覺唔到。
「你話過我喺度嘅，你唔會食煙架。」
沛霖講嘅嘢，我冇乜認真記喺心。
但我講過嘅每一句，
沛霖都記得清清楚楚。
「你有冇認真睇架！」
就算只係揀部電腦，沛霖都好想知道我嘅意見，但我只係敷衍佢。
「我煮咗得好辛苦架！你要食曬佢！」
一個十八歲嘅女仔，為咗自己煮早餐，呢啲女仔究竟去邊到搵。
「喂！我幫你打咗俾子彈喇！」
仲會幫我打點一切，幫我執手尾。
「因為我知道杰仔你唔係啲咁嘅人！」
無論我做過啲咩，佢都選擇相信。
「費事你一個人過咁慘啦！」
婆婆走咗嘅時候，都係得沛霖肯陪我。
到呢一刻，我先發現自己咁後知後覺。
我拎咗婆婆臨走前擺低俾我嗰個盒出嚟，然後打開咗嚟睇。
「唔知道嗰個女主角，會唔會係你。」
不過我知道呢一刻嘅我。
有一件事要做。