[校園] 錯的時間，對的人: 第一章「開學」
早上六點。
「快啲瞓返喇媽咪，拜拜。」
食完了媽媽煮的早餐之後，我便要乘坐地鐵上學。
今天是開學日，但是同前兩年不一樣的是，中三會選科分班。而我就選擇了讀9個科目，雖然是辛苦了點，但這就是所謂的「怕輸」心態吧。普通人都只會讀8科，所以我算是入了精英班。
可能說到這裏你已經一頭霧水。啊，我忘記了説，我叫張皓軒，6歲已經離開了香港，在新加坡讀書。爸爸選擇在這裏做生意，所以我都沒辦法。説真的，有時會懷念香港的生活，不過懷念又如何，回不去了。
不知不覺我就來到了地鐵站，展開我每日九曲十三彎的地鐵旅程。因爲要轉三程車那麼多，有時還要企足全程。
就是爲了去間好些的學校。
「喂，今日咁早嘅。你條蛋散平時要遲我兩班車之後先出現喎。」在月台的不遠處，有個同我一樣穿着白色校服的男生向我揮手。
他是浩勤，就住在我家對面，所以有時會碰到他一齊搭地鐵上學。
「開學第一日你就想我趕住返學咩，上車啦！」
「唉，又無位坐。好攰呀！」浩勤埋怨道。
「你第一日搭鐵咩。」
「Doors closing...」
途中反正都無事做，我便拿出手機和他玩Miniclip的桌球遊戲。
「睇下我新學返嚟嘅絕招！」浩勤二話不説，便將手機螢幕和眼睛幾乎呈一條水平線，試圖將黑球射入。
「仆街。」他將黑球同白球一齊射進了。
「屌，唔玩喇。垃圾GAME。你呢次好彩！」
偏偏我差不多每日都會見到他玩同一個遊戲。
「我知道我會贏先同你玩咋，戇鳩仔。」我恥笑着他，説道。
「係呢，聽講今年老師選咗你入去學生會，入面好多靚女喎～」
話題還轉得真快。
「嘩，你個樣咁衰㗎，不如俾你去做喇。每日都要做DUTY，根本就係搵笨柒。」
「傻嘅，維持秩序呢家嘢梗係由你呢位品學兼優嘅好學生做啦，咁樣我呢啲普通學生先有一個好嘅學習環境㗎嘛。」浩勤裝作嚴肅道。
如果我不認識他的話，我會以爲他是真心的。
「食屎啦，成日掛住打機。讀書幾時會有你份。」
我學校十分傳統，所謂的學生會其實就是做風紀，實質可以爲學生做的很少，有時懷疑自己根本就是幫學校做義工。
不過被老師選中，想避都不行。
今天是中一生的迎新日，學生會亦都要在早上幫手維持秩序。
昨天，學生會主席Whatsapp了我，吩咐今天早會之前要去禮堂後台報到。始終是第一次，學生會裡除了一班在童軍裏面識的同學，沒一個是認識的，所以有點緊張。
浩勤和我不同班，所以到了學校之後我們便分道揚鑣。
來到了禮堂後台，原來很多人都比我早到。
「31，32，33。人齊！好，呢度大家應該都識我，我係學生會主席Clara！今日工作好簡單，最緊要都係將班新生安頓好，跟住你哋就可以返去你哋所屬嘅班級喇。」
主席解釋完後，有位女生走了過來，她戴住一副黑框眼鏡和綁住條馬尾，算是可愛。
「Hi，主席知道你新嚟，所以叫我同你一組。你係皓軒？」
「係啊，叫我軒仔就得喇，3A班。你呢？」
「我叫樂璇呀，3B班。」她微笑道。
她的聲音有點尖銳，後來我先知道原來她是參加合唱團的。她拿着兩張紙牌，應該是爲了班新生而備。
「企喺度舉住呢張紙牌，叫班細路排好隊就得。有咩事我會喺你隔離！」
「好。」
走出後台之後，大家便各自各走去自己的崗位。我向3A班的方向瞄了瞄，發現已經有幾個未來同學坐了那裏。浩勤就坐在3D班裏面，似乎又在玩他的桌球遊戲。
「個幾個女仔都幾靚女喎。」我心想。
我的工作除了舉牌之外其實是沒有東西做的，所以我便和樂璇説起話來。
「係呢，平時DUTY會點分配㗎？」
「好簡單，學生會分成六組，五組會喺早上升旗禮ON DUTY，另外一組就會喺小息時間做DUTY，會俾你早放飯10分鐘。更表每兩個星期就會輪換一次。」
「咁我係邊一組？」
「你估下！我喺第六組！」
「我點知呀......」
「同你一組呀傻仔！主席之前咪Whatsapp過俾你知囉！」她打了我的肩膀一下，笑道。
「乜係咩？」我抓了抓頭，說道。
「又好似係。」
星期一早會的升旗禮完畢後，校長通常都會上台發表演講，今天也不例外。
「希望我哋嘅新同學可以繼續堅持住中正中學一如以往「好學力行，知耻自强」嘅學習精神。祝大家會有個愉快嘅新學年。」
「Good morning ladies and gentlemen. It‘s the start of the year, and we welcome another batch of Sec 1s to the Chung Cheng family…」
當校長在台上一開口，學生們就要準備呆呆坐在原地最少二十分鐘。
因爲他要將演講的內容翻譯成英文再講多次。
正因爲是特選學校的關係，我的中學是比其他普通學校注重雙語教育，對中文的要求亦比較高，所以好多新加坡本地學生都吃不消。對我來説暫時還可以，但不可以像以前那樣，不讀書都考到A了。不過還是要多謝香港幼稚園教得我好，哈哈。
「完未呀，就嚟要瞓着喇......」樂璇細聲地向着我説道。
「唔掂喎你。你睇下班中一仲慘啦，第一日就要聽個長氣校長講廢話，有排佢哋捱。」
「咁人哋真係眼瞓呀嘛，不如你同我傾下計！」樂璇的雙眼亮了起來，興奮道。
「妹妹仔忍下啦，照我計多幾分鐘就會完。俾老師發現就唔好喇。」
「咦～做咩潑人冷水啫。你對其他人都係咁㗎？」樂璇扁嘴道。
我對她反了個白眼，便沒有再理會她。
是的，以前的我是個 100% 遵守學校規律的學生，回想起來都覺得自己很傻，哈哈。