《再見了，還會再見嗎？》: 第18章 – 妳一直都在

就算而家Zoe冇再同我同班，我都有keep住喺學校温書，但已經冇咗有Zoe陪住我嗰時嘅衝勁。

以前我都唔信，但兩個人一齊温書真係會事半功倍。

雖然同Zoe温書嘅時候，我哋係各自戴住耳機好少會傾偈，但總會有啲休息嘅時間玩下放鬆下。

前排有次我落小食部有撞到Zoe㗎，但係我見佢同E班一個靚仔食緊嘢，搞到我都唔係幾好意思行過去打招呼。

之後我又有試過喺放學後過去佢班房，想揾佢一齊温下書，因為我知Zoe一定會留喺學校留到起碼6點。





點知我行到去佢班房門口，又係見到Zoe同嗰個靚仔一齊坐喺班房有講有笑咁。

咁唔通我就咁行過去坐埋喺隔離咩，緊係即刻走啦。

結果我搞到而家11月中我都未同Zoe講過一句嘢。

唔知今日係咩好日子，班人竟然冇喺Lunch Time走過嚟煩我。

一落咗堂，我就將堆今日唔再用嘅書放返入locker。





當我踎低放緊啲書入locker嘅時候，

「砰！砰！」

個locker門唔知俾咩人好大力咁撞到，搞到成個locker門直接撞向我個頭再彈返轉頭。

我成個人即刻由跪喺到變咗瞓喺地下。

雖然個頭痛到我起唔到身，但我嘅意識依然清醒。





「Mary姐，佢好似冇咩事喎」

「冇咩事？佢搞到Zoe同我哋絕交仲想冇咩事？」

「咪係，Zoe從來都冇咁樣鬧過我哋，自從識咗呢條友之後就變晒。等我補多下！」

「停手呀！！！」

「砰！」

我淨係feel到個頭俾人再好大力咁打咗一下，然後就冇咗意識。

跟住我唔知暈咗幾耐。

一擘大眼就已經喺學校醫療室，望出窗外面，原來太陽都已經落山。





「車仔！！」

小雲一見到我就衝入嚟攬住我……

到底發生咗咩事？？？

小雲唔係嬲緊我㗎咩？？？

我係咪昏迷得太多日，連幾時同小雲關係好返都唔知。

「你知唔知你擔心死我喇！！」

小雲一邊講一邊喊。





「吓，我冇事喎……」

到咗呢一刻，我依然唔知頭先發生過咩事。

「你咁樣都話冇事，頭先叫極你都唔醒呀……」小雲無奈地說。

「話我知咩事啦，求下你」

我用一臉誠懇嘅樣子對住小雲。

「我坐咗喺你隔離2個幾……」

「Ahhh……都係唔講喇，唔講喇，唔想再提啊！！走啦我哋，我幫你執好嘢㗎喇〜」

出到學校我再追問小雲。





「做咩唔肯講啫，又唔係咩唔見得光嘅嘢〜」

「哼，唔想講咪唔想講囉，明明你撞親個頭之前都冇咁多嘢問嘅」

「咁我嗰陣都冇嘢想問……」我細細聲講。

「原來一路都冇嘢想問我，去問你個Zoe囉，去啦去啦」

小雲一講完就嘟起個嘴，對我表示不滿。

「我都冇揾佢……」

「仲呃我，你估我唔知你去人地班房咩」小雲抆住我耳仔講。





佢點會知㗎……

「你估我唔知你諗咩嘢咩？你想知我點知嘛，我就係唔話你知！」

「係啵，聽朝返學你記得去揾陳sir啊。我有車喇，聽日見啦〜」

佢咩都冇同我講就走咗……

唔緊要啦，同佢好返就得啦。

返到屋企之後我都冇特登同媽媽講今日發生嘅事，而媽媽全晚亦都冇乜理我同叫我温習，真係奇怪。

〜第二日〜

「陳sir，我係張轟浩啊」我由教員室外嘅電話打入去。

「你等我一陣，我而家出嚟」

過咗2分鐘。

陳sir：「跟我過嚟呢邊先，有啲嘢想同你傾下」

陳sir帶咗我入一間有冷氣嘅細房坐低咗。

陳sir：「你今日仲有冇覺得頭好痛啊？」

我：「冇咩事喇已經」

陳sir：「咁就好，我都係直接啲入正題啦。尋日發生嗰件事之後，我有揾黃同學了解過有關你喺學校同屋企嘅事」

陳sir講嘅黃同學應該係小雲。

陳sir：「首先，我哋校方決定對尋日每一個作出欺凌嘅同學記大過一次。另外，我都了解過少少你屋企嘅情況，你屋企人好似俾咗好大壓力你？」

我：「其實係，媽媽從來都唔會關心我，淨係會以唔同嘅方式鬧我同責怪我，一係就話啲嘢係我嘅責任，一係就話係我自己造成嘅後果」

陳sir：「嗯，同我喺黃同學到聽返嚟嘅差唔多。所以尋日發生咗件事之後我係打電話通知咗你爸爸。你爸爸話因為你冇流血，所以唔使送你去醫院。佢話相信你有朋友陪應該會冇事，同埋會勸你媽媽唔好再逼得你咁緊」 

哦，唔怪得尋晚媽媽成個人變晒啦。

咪住，我暈咗㗎喎，咁都唔使去醫院？？

到底我老竇有幾唔想媽媽知我喺學校發生過呢啲事……

陳sir：「除此之外，我知道你鍾意留喺學校温習，所以我已經用我嘅名義幫你book咗呢到嘅每一個timeslot，你可以喺課餘時間無時無刻嚟呢到，冇人會阻止你。」

嘩，咁誇張，我聽完嗰下真係嘴都O埋。

我：「其實唔使咁誇張啦……」

陳sir：「哈哈，唔使覺得好似係我罰你留堂。你鍾意嚟又得，唔嚟都得，我唔介意嘅。總之呢到就已經book好晒，你想用就用啦。」

嚇死我，仲以為一定要定期嚟報到下。

不過呢到環境都幾好，又有冷氣又夠晒靜，成個自修室咁。

我諗我之後都應該會成日嚟呢到。

我：「陳sir，如果我帶同學一齊嚟呢到得唔得㗎？」

陳sir：「當然可以，呢啲嘢你自己決定啦。只要唔好嘈到隔離教員室就OK」

一陣返去叫埋小雲放學一齊嚟呢到先。

我：「多謝陳sir，今次真係麻煩晒你喇」

陳sir：「唔使咁客氣，呢啲我責任嚟。如果我早啲發現就唔會發生尋日嘅事喇，以後有咩事直接揾我就得，我哋都知Miss Chu係點嘅人㗎喇〜」

陳sir講完拍一拍我膊頭。

陳sir：「行啦，第一堂就係數學，我哋一齊上去啦」

今次係我第一次覺得有老師關心自己，至少係入咗呢間學校後嘅第一次。

「你返埋位先」陳sir對我講。

「尋日喺呢個班房發生過咩事，相信唔使我多講。我唔希望喺呢到再發生呢類欺凌事件，今次佢哋一人一個大過都只係小懲大戒。如果有人再犯，個懲罰一定唔止係咁少，希望所有人都要好好記住。」 

「冇咩問題嘅，我哋今日教……」

小息嗰陣，小雲行咗過嚟。

「傻仔，一陣食唔食晏啊？」小雲問我。

「你唔使同Choco佢哋食咩？」

「見你一個人食咗兩個幾月咁慘，係咪陪下你都唔得先？」

「點會唔得喎！！」

「等咗你呢句好耐喇……」“我”愈講愈細聲。

如果車仔一直都肯同“我”一齊食飯一齊放學，我哋嘅關係會點呢？