《再見了，還會再見嗎？》: 第32章 - 充實的暑假 (下)

經過咗大半個暑假，我已經習慣每朝起身都要去練水。

你冇睇錯，係練水。

估唔到咁怕水嘅我都可以喺一個幾月學到四式呢？

講真嗰句，連我自己都唔敢相信。

原本嘅我真係好唔鍾意做運動，因為我唔鍾意嗰種身水身汗又黐笠笠嘅感覺。





不過游水就完全解決晒所有一般運動會遇到嘅呢啲問題喇。

仲有可能係關我呢種毒毒地嘅心態事啦，我好享受一個人自由自在嘅時間。

落到去水底一片寂靜，唔需要理外界發生咩事。

就算係而家平日嘅我去游水，都鍾意一邊游一邊哼下歌，又或者係思考下人生，總之目的就係想短時間逃離下現實呢種咁壓迫嘅生活。

講開又講，見住身邊啲人游蝶式游到好似條死魚咁沉下沉下，有時真係忍唔住就笑咗出嚟。





我而家每堂去到做嘅嘢就係“蝶背蛙自”咁四式無限loop。

首先就游返正常嘅四式各10個塘先啦，之後就到揸浮板淨用腳嚟游四式各10個塘，最後就係用雙腳夾浮板淨用手嚟游四式各10個塘。

係咪睇到有啲頭暈呢？

簡單嚟講就係正常咁游，然後就分別練腳同練手囉，如果仲有時間剩就會俾我哋隨便亂咁游或者組隊接力比賽下。

我仲要係全班游得最快嗰個，原本Jack Sir仲話想遲啲派我去幫泳會比賽添，不過就俾媽媽ban咗lu。





話說某日夜晚我打俾媽媽，同佢分享下我學游水嗰陣嘅開心事，

「今日我終於成功游到晒四式喇，連Jack Sir都話我學得好快」我高興地說。

「咁叻仔嘅」

「遲啲Jack Sir仲話想我做泳會代表出去玩下比賽添呀」

點知媽媽一聽完，語氣大變。

好似好唔鍾意我去游水咁。

「如果佢要你去比賽嘅話，你叫佢打電話俾我，叫佢同我傾。我係絕對唔會俾你去比賽㗎」媽媽對我講。

媽媽態度變到好強硬，搞到我有少少驚。





「點解呀？都係去玩下試下咋嘛」

「佢叫得你去比賽嘅話，就會逼你遲啲每個禮拜都要抽空餘時間去練水。你仲係學生嚟㗎，讀好書先係你最重要應該做嘅嘢」

我好似平時咁冇出聲。

「我見過唔少人就係因為掛住玩運動就搞到成績都差晒。就算我俾你一放學就去練水，你練完之後都攰到冇心機温書啦，到時成績差咗就真係後悔都嚟唔切喇」

我繼續冇出聲，但媽媽都繼續講。

「更何況你都已經大個，贏塊獎牌返嚟都冇咩用。你鍾意游嘅就自己落會所游飽佢，總之完咗暑假就冇得再學」

媽媽一講完就收咗線，我亦都冇嘢好講。





今日上完最後一堂，我返到嫲嫲屋企嘅第一件事唔係沖涼同食飯，而係走去開電腦上校網。

因為今日係出分班名單嘅大日子，緊係準時入去內聯網睇啦。

喺我仲諗緊內聯網個密碼係咩嘅時候，Facebook彈咗個通知出嚟。

「車仔，我同你同Choco都入咗A班呀！！！」

相信唔使我多講，你哋都估到揾我嘅係邊個啦。

「咁阿天同雯雯呢？」我回覆。

「佢哋都係A班啊 ^.^」

「估唔到終於有機會同佢哋一班luuuu」





「我有你同Choco同我一班就滿足㗎喇 (^-^)」

雖然我已經知道咗大部分熟人嘅分班結果，但仍然仲有一個我想知嘅人我係冇問到小雲。

「原來佢都繼續留喺E班……」

唔知以後仲有冇機會同佢同班呢。

現實嘅我諗返轉頭，原來我成個中學生涯最開心最滿足就係中三呢一年。

喺呢一年入面，我將會面對好多我嘅第一次。

至於包含咗咩事我就唔多講喇，等你哋一直追落去啦。