〜晏晝2點〜

111室……喺邊到呢……

「車仔,咁早到嘅」陳sir喺後面叫我。

「我驚會遲嘛」

「咁乖仔,跟我入去坐低等下先啦,應該仲有幾個同學嚟緊」





有5個人喺我之後入咗嚟。

「睇嚟人齊喇喎,咁等我簡單解釋下呢到係咩事先啦」陳sir對我哋講。

「坐得喺呢到嘅呢,全部都係俾人記咗個缺點嘅,至於係因為咩事就自己心照喇。不過,你哋好好彩地有老師覺得你哋應該受到特赦,所以先會被推薦咗嚟呢到,請大家要好好珍惜呢個機會」

「而家要麻煩你哋坐晒去中間先,3個人一組啦」陳sir對我哋所有人講。

一男一女行咗過嚟我到。





「我叫車仔啊,你哋叫咩名呀?」

「我叫Parco」 「我叫Lily」

Parco係由內到外都散發住嗰種電車男氣場嘅男仔。

而Lily就係嗰種有啲肉地但又未去到你會覺得佢係肥嘅嗰種身形嘅女仔。

「分好組就望返出嚟先,我講一講呢個計劃要做啲咩」





「而家你哋就有2組啦,咁我哋嘅活動就係每逢禮拜一放學後進行嘅,不過你哋係每組輪流咁隔個禮拜嚟就ok㗎喇」

「咁我叫車仔嗰到做第1組啦,後面嘅3位同學就係第2組。大家出嚟我前面攞張紙先」

張紙印住嘅係計劃嘅日期同簡介。

「睇返張紙先,由今日開始去到12月,每組分別會有8次聚會。咁今日第一次就係簡介會啦,之後就會有社工嘅堂啦,仲會有社區服務嘅」

睇落都幾麻煩,不過都冇得唔做啦,話晒去齊可以整走個缺點喎。

「你哋同組員互相交換咗個電話先,因為之後有好多嘢你哋要一齊準備同一齊整」

「陳sir,我哋而家可以落電話出嚟用?」Parco舉手問。

「冇問題啊,有我睇住」陳sir同我哋講。





「我哋互相俾個電話對方入,然後再交換啦,咁樣好似快啲」我提議。

「好啊」Lily回應我。

「搞掂之後就唔該熄返個電話喇,我冇話可以俾你哋開電話做其他嘢㗎」陳sir嚴肅咁講。


「我哋開始今日嘅活動先,咁今日呢……」

大約4點,今日嘅第一次聚會就結束咗。

「下個禮拜將會係第一組嚟先啊,記得唔好遲喇」陳sir再三提醒我哋。

「知道!!」我哋三個一齊回應。





「車仔,有啲私人嘢我想你留一留低,其他同學可以走先」

死啦,係咪我做錯咗啲乜嘢要俾陳sir留低呢?

但自問我啱啱都冇做錯啲咩,加上又準時嚟到,應該冇咩掛……

「車仔,做咩面青口唇白咁啊,我嚇親你咩?」

你都知呢,話晒你都係訓導主任,唔驚就奇啦。

「唔係……」我回應。

「喂唔係呀,我想話你知我今年都有幫你book下面間房咋,你要就隨便自己去啦」

嚇死人咩,原來係咁咋……





「哦,唔該晒陳sir,我一定會去㗎!!」

〜當日夜晚〜

啱啱温完書諗住開個電腦聽下歌,點知就即刻彈咗2個通知出嚟,一個係交友邀請,一個係嚟自聊天室。

「陳凱莉給你發送了一則交友邀請」

邊個嚟㗎,我都唔識佢嘅。

都係唔好亂咁加人喇。

睇埋個Chatroom先,





「又係陳凱莉?」我心想。

唉,睇埋個message再算。

「Hello,我係Lily啊。我用電話號碼揾到你哋兩個個Facebook,所以就諗住加咗先,方便遲啲開個三人group傾嘢呀」

哦,原來識得嘅。

望住佢嗰張跳緊舞影嘅profile picture,仲要得個側臉,真係認唔到係佢嚟囉。

我覆返佢,

「我加咗你好友喇,你負責開group啦,麻煩晒 ^.^」

過咗30秒,

「你已被陳凱莉加入對話群組」

又會咁快手。

唔理喇,瞓覺先。
已有 0 人追稿