《再見了，還會再見嗎？》: 第48章 – 天使前的詛咒許願

跟住落嚟嘅日子都係如常返學，同埋完成最後幾次嘅改進計劃。

因為冇咩特別，所以我都唔多講喇。

一輪辛苦過後，終於有得放個聖誕假休息下。

雖然都係得嗰十日，而且仲要準備考試，不過點都好過冇假放啦。

都係同平時一樣啦，一放長假就會去嫲嫲屋企住。





叮〜

又會温温下書電腦響嘅。

原來係facebook有新訊息。

係小雲，仲要在線上。

「我問咗大家喇，佢哋話除夕嗰晚出尖沙咀玩喎，你得唔得閒啊？」





「我要問下屋企人先，一陣覆你」

「好啊」

去問下嫲嫲俾唔俾先，我諗應該ok掛…… 

只要唔好同媽媽講。

我行入廚房，揾準備緊晚餐俾我嘅嫲嫲。





「嫲嫲，我除夕嗰晚想同朋友一齊出去倒數呀」

「冇問題呀，到時我俾鎖鑰你自己返嚟啦，天光前好返嚟喇」

估唔到咁順利。

「另外呢…… 可唔可以……」

「唔好同你阿媽講？我識做啦，放心去玩」

咁就好喇……

「唔該嫲嫲〜」

我入返房，喺電腦前面坐低。





我：「我可以出嚟啊，到時仲有邊個會到㗎？」

小雲：「咪又係平時大家一齊食飯嗰班囉，全部都會嚟啊」

我：「咁多人！！」

小雲：「所以咪好想你都一齊嚟囉，咁就齊人喇」

我：「咁我哋到時見啦〜 温書加油呀〜」

小雲：「你都係〜」

真係好，竟然會約喺尖沙咀，由呢到行過去連15分鐘都唔使。





〜12月23日〜

叮〜 叮〜

邊個咁夜仲send訊息嚟…… 

都啱啱攤咗上床諗住瞓覺。

原來係阿盈。

「生日快樂呀，車仔〜」

「我係咪今年第一個同你講生日快樂嘅人呢？ XD」

我望一望電腦個鐘，原來啱啱過咗12點，係12月24號。





我都係快啲覆返阿盈就去瞓，温咗成日書都咪話唔攰。

「多謝你啊，係第一個呀」
 
「XDDD 唔阻你休息喇，大家都早抖啦〜」
 
我冇覆到就去咗瞓，因為真係好攰。
 
第二日起身，嫲嫲同我講咗句生日快樂，仲話會買個蛋糕返嚟同我點蠟燭。
 
除此之外，都係好似平時咁過。
 
其實我覺得生日咪又係咁樣過，使乜當係一個特別嘅日子。
 




即使係生日，咪又係要温書，咪又係要返工返學。
 
晏晝嗰陣，電腦又收到訊息，今次係小雲。
 
「車仔生日快樂啊〜」
 
我又望一望電腦個鐘，係12:24。
 
「多謝小雲，又會咁準時12:24嘅 XD」
 
「我上年都係呢個時候打電話俾你㗎，係你冇為意咋嘛」
 
乜原來係㗎……
 
我：「乜係咩，sorry啊，我真係唔知道 TAT」
 
小雲：「生日講咩sorry啫，今日會去邊到玩呀」
 
我：「冇啊，我去咗嫲嫲屋企陪下佢咋。話晒都老人家，唔知仲有幾多機會可以見面嘛」
 
小雲：「咁乖仔，寧願陪嫲嫲都唔去玩。好啦，唔阻你陪嫲嫲喇〜」
 
跟住成個晏晝仲收到晒嚟自阿天，雯雯……
 
唉，太多喇，我都係唔列晒出嚟，總之就係所有人啦。
 
成世仔都未試過有咁多人同自己講生日快樂，原來多朋友都會有啲咁嘅麻煩。
 
夜晚嘅時候，嫲嫲拎咗個新出未夠半年嘅天使蛋糕出嚟。
 
其實我一直都想試下，因為見佢好多cream好似好吸引，但係又冇理由一個人買嚟食㗎嘛。
 
嫲嫲將蛋糕上嘅蠟燭點著，然後講咗句
 
「車仔，許願先啦」
 
我雙手合十，再合埋眼。
 
許咩願好呢…… 其實我又冇咩願望。
 
不如我幫身邊嘅人許願啦！
 
「希望未有另一半嘅都可以同鍾意嘅人一齊。如果有另一半嘅就長長久久，唔好鬧交！！！」
 
我打開眼，將蠟燭吹熄。
 
願望應該會實現掛。