《再見了，還會再見嗎？》: 第61章 – 四人約會（上）

「約今個星期日好唔好呀？」Anson喺Facebook問我。
 
「好啊，咁我話返俾阿盈聽今個星期日㗎喇喎」
 
我㩒落同阿盈嘅聊天室。
 
原來我啱啱睇完唔記得咗覆。
 
「Anson佢哋話約今個星期日啊，你係咪得閒㗎？」
 




一㩒完句嘢出去，阿盈就即刻上線。
 
「我得啊 XD 你而家有咩做啊？」
 
「我喺屋企都冇咩可以做啦，都係温下書啫」
 
「咁我唔阻你做嘢喇，我都温下書先〜」
 
唉，點解今年咁多測驗㗎。
 




上咗中三之後好似就一直要温書咁，都未有得點休息過。
 
〜星期六夜晚〜
 
「聽日一齊食早餐先再去揾佢哋好唔好啊？」阿盈喺Facebook問我。
 
講開又講，原來都已經好耐冇同過阿盈一齊食早餐。
 
因為平時返學都會想休息多啲，所以一起身就去刷牙洗臉，然後咬住個包再拎盒維他奶就衝出門口。
 




係有時如果阿盈一早約咗我話食早餐嘅，我先至會早15分鐘起身。
 
不過其實好多時都係喺學校小賣部買盒嘢飲，跟住坐低傾下計就算。
 
「好啊，咁我哋喺茶餐廳嗰到等？」
 
「我聽朝去你屋企樓下啦，你喺屋企等我電話就得」
 
真係好，又可以瞓耐啲先起身。
 
「又會突然咁好嘅？」
 
「你想暗示啲咩啫，明明我不嬲都係咁好」
 
「冇啊，我不嬲都話你好好〜〜」




 
「咁我聽日9:30去到你樓下啦，到時再打俾你」
 
〜星期日〜
 
鈴〜 鈴〜
 
攤喺床上嘅我拎起書枱部電話。
 
「喂？」
 
「你把聲… 你啱啱起身呀？」阿盈問我。
 
死喇，點解啱啱會聽唔到鬧鐘響㗎呢？
 




過咗去嘅嘢都係唔好諗返轉頭，諗嚟都冇意思。
 
「你俾多10分鐘我，我好快落得嚟㗎喇！！」
 
「慢慢啦，我都係啱啱出門口咋嘛〜 」阿盈回應。
 
「又話到樓下先打俾我……」
 
「打俾你都係想睇下你起身未啫〜 你知你㗎啦，成日唔到最後一分鐘都唔肯起身嘅」
 
雖然又好似真係……
 
「唔阻你梳洗喇，一陣你搞掂就落嚟啦，我喺樓下個花園到等你」
 
講多兩句之後我哋就收咗線。




 
跟住我以最快嘅速度刷牙洗臉，然後搭𨋢落樓下揾阿盈。
 
落到樓下花園，行咗個圈都未見阿盈嘅身影。
 
於是我坐咗喺個小公園嘅韆鞦等阿盈。
 
過咗兩三分鐘，阿盈就嚟到。
 
「咁快落咗嚟嘅你」阿盈一行到過嚟就拖住我隻手。
 
「想見你咪快啲落嚟囉〜」
 
「又亂講嘢，想食咩呀？」阿盈問我。
 




食咩好呢？
 
成日都要諗呢啲問題，真係好麻煩。
 
「去返平時間茶餐廳啦，唔想諗喇〜」
 
「咁行啦〜」
 
食完嘢嘅時候都已經差唔多11點，我哋就出發去體育館揾Anson同Choco佢哋。
 
「原來個體育館喺你屋企附近，早知我過嚟呢邊同你食早餐啦」我對阿盈講。
 
「你覺得如果我約你嚟呢邊，你會準時到咩……」阿盈無奈地回應。
 
雖然阿盈咁講真係好衰，但佢講嘅的確係事實。
 
同朋友約會遲到我就真係好少嘅，但成日都食唔到早餐就係真嘅。
 
如果約喺呢到等，我諗我嚟到嘅時候應該就已經得返10分鐘食早餐。
 
「咁你又冇講錯嘅……」
 
「我打俾佢哋睇下佢哋兩個到未先」阿盈對我講。
 
「我哋去嗰邊長櫈坐低先啦」
 
行緊去坐嘅時候，阿盈個電話響起。
 
「我哋都啱啱到咗體育館喇」阿盈回應。
 
「咁我哋上嚟2樓啦，2分鐘到」
 
然後阿盈就收咗線。
 
「上去2樓啦我哋，佢兩個原來早過我哋到，已經攞咗場喇」
 
我拖住阿盈向樓梯嗰邊行。
 
「行後面啦，後面有𨋢搭上去，一出就係個場喇〜」阿盈對我講。