《再見了，還會再見嗎？》: 第66章 – 離離合合

Anson:「我諗你都知我同Choco有少少唔開心嘅事發生咗㗎啦，咁係因為我覺得佢好似我阿媽咁，成日管我呢樣嗰樣」
 
「好辛苦呀！！」
 
老實講，阿媽係點我就唔知嘅，但應該就係覺得Choco好煩？
 
我：「點解你會覺得佢好煩先，明明你哋之前相處都好好地㗎？」
 
Anson：「一開始嗰陣都冇嘢㗎，係前排開始佢就成日都問我喺邊，又問我做緊乜」
 




我：「咁好平常啫，唔係關心你又點會問你啊？」
 
Anson：「你唔明㗎喇，佢係真係好似個阿媽咁，我做乜佢都話唔俾嘅」
 
我：「有冇啲例子講嚟聽下啊？」
 
Anson：「例如我同佢食飯啦，我叫杯凍嘢佢都會話我，但係佢自己又飲喎，邊有咁樣雙重標準㗎」
 
好彩阿盈唔係咁啫……
 




我：「你有冇試過同返Choco講你嘅感受呀？」
 
Anson：「講鬼咩…… 我一同佢講話我唔滿意，佢就話平時佢都忍咗我好多嘢，反而而家我就連呢少少嘢都忍唔到」
 
我：「你平時做咗咩衰嘢呀？搞到Choco對你都好似咁不滿咁嘅？」
 
Anson：「佢講嚟講去，咪又係我平時約咗佢但係遲咗到，又唔送佢返屋企嗰啲，好小事啫」
 
咁呢啲係真係你唔啱喎…… 約咗人哋仲遲到……
 




我就當然冇咁樣應佢啦，話晒人哋都嚟揾我傾訴，我仲邊好意思話佢。
 
我：「唉，好心你就改下啲壞習慣啦，搞到成日激嬲人哋」
 
Anson：「你估真係咁易話改就改咩，都已經因為呢啲事鬧咗交好多次，開始覺得好攰想分手，唉」
 
分手？？？
 
唔係搞到咁大件事嘛？？？
 
我：「再堅持下啦，可能再傾下就冇事呢？」
 
Anson：「唉，好啦好啦，咁我睇下考完個試有冇時間先再決定啦」
 
唔係Anson講我都醒唔起，原來過多半個月就考試，睇嚟呢排都要開始勤力啲先得喇……




 
跟住我哋再傾咗陣就瞓覺。
 
第二日返到學校，我有特别留意下Choco對Anson嘅反應。
 
作為一個旁觀者去睇嘅話，會見到佢兩個同平日冇乜分別，都係成日都出雙入對。
 
咁又係嘅，佢哋又唔係鬧好大交，只係相處之間有一啲小暗湧，唔知幾時先會有啲嘢觸發到，然後爆出嚟。
 
到底兩個人相處，係要將所有嘢都坦誠講出嚟，定抑或係要收收埋埋，為咗令對方開心同避免鬧交呢？
 
如果你問而家嘅我，就緊係會答你要趁啲事未惡化之前去解決啦。
 
如果唔係，去到鬧大交先一次過講，就會變得一發不可收拾。
 




而最後就只有逼於無奈地分開呢個選擇。
 
不過，以前嘅我又邊有咁識諗呢，唉……
 
哎喲，好似講得遠咗，都係返返去中三嗰陣先啦，之後嘅事之後再講！
 
雖然Choco同Anson依然都係成日一齊出出入入，但如果留心睇下，就會發現佢哋嘅舉動已經再冇以前咁親密，好似有一層無形嘅隔膜喺中間。
 
唔通佢哋最後都係要分開？
 
唉，講咗咁耐呢啲唔開心嘅事，我哋講返啲開心嘢啦～
 
話說上個禮拜，小雲終於同Simon一齊咗喇～
 
點解我會知道呢？




 
係因為有個星期六，我同阿盈約咗一齊食早餐之後温書。
 
點知食食下嘢嗰陣，小雲同Simon兩個人拖住咁行咗入嚟。
 
佢哋一行入嚟嗰下，我哋4個都嚇親，即刻打咗個突。
 
跟住係Simon首先出聲，
 
Simon：「又會咁啱撞到你哋嘅，哈哈」
 
我同小雲對望笑一笑。
 
阿盈：「你哋都鬼馬喇，一齊咗都唔講聲俾我哋知」
 




Simon：「我哋坐低一齊食嘢你介唔介意先？」
 
阿盈：「坐啦！」
 
跟住我同小雲成個早餐都冇乜出聲，留返俾Simon同阿盈兩個人傾偈，靜靜地坐喺旁邊聽佢哋講嘢。
 
見到小雲可以同鍾意嘅人一齊，我都替佢覺得開心㗎，話晒都係曾經嘅好朋友嘛～