人要惡過車！: 第六章（06/07/2020 Updated Version）

咇咇咇咇、咇咇咇咇

「仆街啦，八點八嗱，仲約咗阿堯九點喺佢度等㗎。」

我即刻刷個牙，拎齊所有嘢去攞車，即刻飛過去元朗換阿堯。好好彩咁我真係啱啱好九點到，佢拎住兩份三文治同兩杯咖啡，行埋嚟上車。

「好準時喎，真係九點正到。」

「梗係啦。」





「睇你頭都未疏，一定係未食早餐趕住出嚟啦。嗱，睇我幾好人整埋比你啦。」

「多謝你喎。」

「唔要罷就。」

「要呀要呀，肚餓呀。」

好衰唔衰我揀咗㗎棍波車，一隻手揸棍，一隻手揸軚盤，又唔可以停低嘆早餐，咁點好呢？





無錯，等阿堯食完之後再將我個包對落我個口度，我淨係負責咬同吞。

喺去緊大欖隧道果陣，停咗係朗屏站個燈口，聽到後面有熟悉嘅引擎聲，最後架AE111停咗喺隔離，我哋襯停燈傾咗陣計。

「車女朋友呀？」輝哥嗌過嚟。

「唔係啦，佢就想。」

「哼！收皮啦你。」阿堯即刻扮嬲。





「架Civic幾靚喎，你估你下個街口前跟唔跟得貼我？」

「下？」

「就轉燈㗎啦，我唔等㗎啦。」

結果燈口前，4AGE 20V同B16B鬥呼油，準備一嘢彈出去，紅、黃、綠燈着咗，兩架車標咗出去，着Tec嗰下真係天賴之音，二波96km/h。

但係架111真係快，順住燈拋緊我，最後我上橋而佢落返元朗市，而我玩完先醒起我車緊阿堯。

「無啦鬥咩車呀你，唔洗返學呀？」阿堯表示不滿。

「Sorry囉。」

「算你啦，嗱，食包啦。」





結果我經大欖隧道出九龍，講真差唔多成五十蚊真係幾貴，不過真係快嘅，最後我哋泊低架車喺大學個停車場，行返去上堂。