注意:以下為阿堯嘅日記。

估唔到我真係可以去阿僖屋企瞓,佢個傻仔仲諗住比間房我之後自己訓廳,咁我就叫佢返嚟房一齊訓,佢仲扭扭捏捏咁,嘻,我邊會介意同你一齊訓呀。咁我就轉用個認真嘅語氣講嘢啦,哩個傻仔從來唔敢唔聽我話,睇怕佢以後都係比我食住㗎喇哈哈。第二日我襯佢未起身,諗住煮早餐比Auntie Uncle同個傻仔啦,點知Auntie Uncle已經食咗嘢,Auntie仲煮埋我嗰份,有炒蛋 火腿同多士,雖然簡簡單單,但真係好好味呀。食完我就問咁阿僖嗰份呢,Auntie話佢實未起身所以唔煮佢嗰份,咁就啱啦,到我大顯身手,我去廚房整咗份三文治比個傻仔,正當我想行去叫醒阿僖嗰陣,auntie問我一唔一齊探阿僖個婆婆,我梗係求之不得啦。我即刻去叫醒個傻仔,望住佢瞓覺傻下傻下嗰樣,真係幾治癒。望咗望之後我就叫醒佢,佢即刻走咗去刷牙洗面,auntie叫咗我埋去,問我點樣叫醒佢,原來個傻仔次次一定會翻訓。佢出嚟之後我比咗份三文治佢,佢就同Uncle去咗攞車,我同Auntie執埋啲嘢就落去等佢哋。落到去,我同auntie坐車尾,望住Uncle揸車嗰認真樣,簡直同個傻仔一模一樣,咁接埋婆婆就去咗飲茶,我同Auntie 婆婆去攞位先,Uncle同個傻仔去泊車,行緊去茶樓嗰陣,婆婆喺度問我覺得阿僖點樣,搞到鬼咁緊張,Auntie仲叫我考慮下個傻仔,話個傻仔係蠢啲。咪係囉,一啲表示都無。哼。
已有 0 人追稿