「返上車喇我啦。」我同阿堯講。
「嗯。」
「喂,咁就想走?」金毛mk大叫。
「嚟啦,快快手收你皮返歸。」我回返佢一句。

與此同時,其他車都嚟到,諗住睇車或者落場砌。原來個柒頭金毛又係揸架白色四門EK,佢喺停車場出口度等緊我。

「快撚啲啦,你唔撚係連車都無呀?」個柒頭又鳩叫,佢班𡃁就喺度起哄。
我無理佢,同堯上車之後就揸過個柒頭隔離。去到佢後面先見到佢個車尾寫咗三隻字「EXi」,我心諗:「唔係嘛,認真咩?」
咁我無理啦,照停喺佢隔離。





「大佬,唔對路喎,條友揸白EK㗎喎,唔通佢就係傳聞嗰部?」條𡃁細細聲講。
「屌你唔好咁肴底啦,一定係咁啱㗎啫,睇我點放爆佢啦。」
「喂,點鬥呀垃圾?」我叫佢。
「龍富路燈口,直踩虹橋油站。」
「哦。咁開始啦。」我邊講邊上車。
我同佢慢慢揸到龍富路出九龍路口,綠燈一着,代表比賽開始。

咁我一腳踩到底,架車即刻比反應我,速度爬升至120km/h。我一路飛,一路飛,去到高爾夫球埸附近我見唔到佢,決定收油等埋佢,過多陣後鏡再次出現佢架車,咁嗰陣已經嚟到龍門居上面,你知龍富路落皇珠路隻右彎係幾急㗎啦,以前都有啲拖頭佬同泥鬼喺度炒,咁我自然收一收油啦,條柒頭見我收油仲唔識驚,走去督油想爬我,我想頂一頂佢都趕唔切,佢一嘢炒落石磗,連人帶車飛過對面線,原本都想停低睇吓佢有無事,但一諗到佢頭先咁搞阿堯,我決定直接走。
「唔理佢呀?」堯問我。




「抵撚佢死呀,頭先咁蝦你。」我冷笑一聲。
咁我經過虹橋油站嗰陣無停低,只見條柒頭班𡃁O哂嘴,我都廢事理佢,返緊去途中,堯搭咗隻手喺我揸波棍隻手度。
「頭先⋯你講嘅嘢⋯係咪真㗎?」堯面紅紅,細細聲咁問我。
「你指?」我喺度諗佢想講咩。
「你話⋯我係你女朋友⋯係咪真㗎?」今次比上一句更細聲。
「咁呀。堯,你肯唔肯做我女朋友?」我反問返佢。
佢今次無出聲,只係怕怕醜醜咁點頭。
咁返到去泊低㗎車,返上去嗰陣我拖住堯隻手。
「返去咯。」
「嗯。」
已有 0 人追稿