人要惡過車！: 第二十四章 (27/07/2020 Updated Version)

注意：以下已轉回僖的視角。

訓醒之後，決定去check吓架車，例如睇吓偈油量，順便試吓車。咁打開頭冚，check一check偈油，都夠用，未洗入住，之後就著車，周圍兜吓試吓架車。

喺屋企附近兜緊圈嗰陣，標板無啦啦著咗電池燈同偈燈，架車當堂唔係好有力，咁我即刻停埋一邊，睇吓個電壓錶，得11V，心諗：唔對路喎。熄車抖咗陣之後，再著車試下，架車係行到，但反應一定比之前遲鈍。

咁我揸架車去耀哥間車房，途中熄哂冷氣，車機，盡量避免扯乾粒電，咁我都廢事行屯門公路，萬一喺高速公路壞都幾濕濟。行下路嘅同時望下海景，吹下生風，係幾舒服過癮嘅。

嚟到耀哥間車房，見耀哥啱啱開閘，我停低架車搵佢。





「喂，僖仔。」

「早晨呀，耀哥。架車神神地，想搵你睇睇。」

「架車邊事？」耀哥圍住架車望。

「今朝架車著咗電池燈同偈燈，跟著就無乜力。」

「係呀，咁我幫你睇睇，可能你要擺低架車幾日。呀，係喎，啱啱車房嚟咗架新玩具，比你揸幾日啦。」





「咩新玩具呀？」我問。

「嗱，哩部呀。」耀哥打開車冚，原來係架DC2R。

「DC2喎，邊好意思呀。」

「客咩氣呀，攞去試下啦，架思域我幫你搞搞佢。」耀哥拍拍我膊頭。

「咁唔該曬啦。」





架DC2又真係幾靚喎，冠軍白全原裝，一著車，副B18C完全無雜聲，油門又幾敏感，踩少少就比到反應。當我沉醉緊喺架DC2嗰陣，堯打電話嚟。



「你去咗邊呀？我一訓醒就唔見咗你。」堯好焦急咁講。

「我攞咗架車去整喳嘛。」

「咁你依家喺邊呀？」

「荃灣。」

「咁你快啲返嚟啦，我喺屋企等你呀。」堯喺度嗲我。

「哦，好呀。」





架DC2個極力子唔算難控制，係起圍要比多些少油，咁我返屯門梗係行屯門公路啦，順便試吓架DC2。荃灣路一上，三波高轉，啲爆tec聲仲好聽過啲咩交響樂，仲要一路扯到你上八、九千轉，比起我副B16B仲更加癲，簡直會令你想一路踩，一路踩。咁上晝屯門公路入屯門就唔算好多車，飛盡啲都無所謂，百二三劈落隻彎嗰陣，完全係貼住路面咁吸住你出彎，架DC2真係好掂，唔洗一陣就返到屯門，泊低喺屋企樓下，返去搵個傻妹。