人要惡過車！: 第五十六章

星期一又要返早，晨咁早就飛返學校，不過返得早放得早，下晝有得做自己嘢，事關堯下晝同兩姊妹行街。

我車咗堯去鑽石山，之後自己走。

我不自覺地轉咗上清水灣道，結果不出我所料，我又見到黑色MX5，停咗喺油站。

「Hi 」

「Hi，換咗車喎。」





「係呀，有冇興趣玩返轉？」

「好呀，落西貢？」

「好。」

「咁行未？」

「等我入埋油先。」





幫我入油嘅係上次個Jacky兄。

「你架CF4乾淨咗喎，洗完車嚟？」

「係呀，你係上次EK個師兄嘛。」

「哈哈。」

「你架FD2都好靚仔呀，嗱，油卡同單。」





「唔該曬。」

我着車同示意Ophelia行。

哩個女仔又真係一出油站就地板油衝住去，換咗車之後要追貼佢無之前揸EK咁難，話雖如此，我感覺到佢比上次係跑得更加快。

一路喺清水灣道衝到落西貢公路迴旋處，沿途係無任何時間比我放鬆。

之後我哋揸車去到西貢，泊低架車。

「唔錯呀，比上次仲快咗喎。」我話。

「你都係呀，輕輕鬆鬆咁追上嚟。」

「換咗架車啫，清水灣道我未夠你嚟。」





「你謙虛啫，係喎，去唔去食嘢？」

「好。」

我哋行咗去間Cafe，邊食邊傾。

食完嘢，Ophelia走先，我喺西貢hea多陣，講返Ophelia先，佢比起以前變咗好多，開朗咗。