人要惡過車！: 第七十三章
「乖女你行得未？」
「Ok啦。 」
今日係阿女嘅家長日，所以我揸車同佢去。
喺去緊學校嘅途中，後面有部DC5跟住我，而且好熟口面。
喺學校出面泊好車，就行入學校。
「Cherry！」阿女嗌住咁行過去喺DC5落車嘅女仔。
哈！唔怪得知咁熟口面，原來架車經過我手。
「阿彤早晨。」嗰女仔微笑著講。
真係諗唔到咁乖嘅女仔會揸大膽車，仲要揸咁快。
。
。
。
見完家長，兩個後生女行喺前面，我同Cherry個阿爸喺後面跟住。
「曉彤真係乖，又叻女。」個阿叔講。
「Cherry都好乖呀，讀書又好。」
「哈哈，見到個女識到朋友我都安慰啲。」
「哦？」
「哩個女由細到大都唔識同人溝通，一直都自己一個人，所以好多謝曉彤肯同Cherry做朋友。」
唔洗講到咁嚴重呀嘛，做朋友好小事啫。
「哈哈，我都要多謝Cherry咁照顧曉彤。」
一路同阿叔傾計，先知原來佢成日要返工，唔得閒照顧個女。
「哈，你架DC5都幾靚喎。」
「EG6都好型呀。」
「講哩啲。」
「係呢，可唔可以幫手睇吓架車？我架車盞車頭燈好似怪怪地。」
乜我上次唔記得較返好盞頭燈咩？
「哦，梗係無問題，我幫你睇睇。」