人要惡過車！: 第七十八章

喺某一個星期六，我難得嘅早起身，因為Uncle約埋阿爸同我去睇車。

「阿爸你揸車？」

「哦，好呀，揸你嗰架啦咁。」

「哦。」

平時司機位坐得多，都好耐無坐乘客位，既然阿爸揸車，咁我上到車瞓多陣都無問題。





話咁快嚟到錦田某一間二手車行，門口泊咗架DB8R，睇嚟Uncle已經到咗。

「喂，今日睇咩車？」阿爸問Uncle。

「就嗰架喳嘛。」

噢，係一架白色嘅前期型嘅NSX NA1。

「N仔？」





「係呀，好似好正，91年車，搵人驗過係直版，無乜銹，機器精神嘅，係極力子就嚟要換，不過唔大問題，價錢都合理。」

「咁落得訂啦？」

「係嘅，同埋搵埋你哋嚟睇吓架車買唔買得過。」

之後我哋問咗負責人拎條車匙，睇吓內籠點樣，對皮凳係新淨嘅，而車機本身改咗大面板有藍芽嗰種，不過負責人就話有埋原裝嗰部可以跟埋畀我哋。

着埋車，輕輕畀兩啖油，轉數爬升速度係快嘅，而引擎倉亦唔會傳嚟不尋常嘅異響，所以哩架N仔嘅狀態的確一流，所以試完車Uncle二話不說就去咗落訂。





搞掂好啲嘢，但架N仔因為未續牌費，所以未揸得住。

咁啱嚟開錦田，咁梗係上埋大山啦，不過阿爸唔會激劈，係咁兒玩吓山路算。

阿爸揸住架FD2，跟住Uncle架DB8上山，過咗英雄亭之後，倒後鏡又出現多架車，今次係紅色嘅EG6，擺明係耀哥啦，無幾耐我電話就響，而我開咗擴音，畀阿爸聽。

「喂，僖仔咁都見到你嘅。」

「喂，你咁得閒上嚟，唔洗做咩？」阿爸話。

「啱啱幫架車換咗啲嘢咪上嚟試車囉，你又搶咗個仔架車呀？」

「唔好搶搶聲咁難聽，架車咪又係我買嘅。」

「下話。」





「認唔認得我前面架DB8？」

「我鬼知咩。」

「林錦DB8喎。」

「係真唔係呀？」

「你跟埋嚟咪知。」

「好。」

喺講電話嗰陣，我哋已經上到大帽山頂，準備落斜去荃灣方向。





與此同時，有架裝咗響喉、碳纖維頭冚，改曬包圍嘅GD3，逆綫夾硬爬上去。

「信唔信五個彎之內佢一定攬山？」阿爸好認真咁問我。

「你點知？」

「一陣睇吓啦咁。」

第一隻彎 —— 無事。

。

第二隻彎 —— 無事。

。





第三隻彎 —— 都無事。

。

嚟到第四隻彎，前面傳嚟好大聲嘅響呔聲。

「哼，準備睇戲啦喎。」阿爸冷笑一聲。

話未說完，我哋已經聽到行雷咁大聲嘅響聲。

𠵱～～～呯！！！

嚟到第五隻彎，只見碎片滿地，而架GD3炒埋山邊，成份頭摺咗入去，睇嚟架車都係救唔返。





「話撚咗啦。」

「咁依家點？叫白車？」

「唔洗，佢自己攞嚟嘅。」阿爸臉容變得嚴肅起嚟。

「吓？」

「佢咁樣亂嚟，幾多條命都唔夠佢死，好彩佢無害到其他人，佢自己攬山咪交返畀佢自己負責。」

「Ok Fine。」講真，阿爸認真Mode上嚟我真係唔夠膽惹佢。

我哋無視架GD3同佢個司機嘅生死，直接落返荃灣，泊低架車食Lunch。

一個後生仔同埋成班阿叔一齊食Lunch，感覺硬係有啲怪。

「係喎，耀哥我想問之前條尾泵把整好咗？」

「整好啦，做咩？」

「睇吓得閒換返啫。」

「條無限嘢唔好咩。」

「唔係呀，只係覺得原裝包圍同條無限泵把唔多襯啫。」

「哦～咁你一陣嚟換啦，我遲下幫你儲埋一套無限包圍啦。」

「好，唔該曬先。」