經過幾日嘅仔細檢查,確定Chris仔無問題之後,醫生就批准佢出院,出院嗰日我哋四個去咗接佢。

「話說你嗰日係點炒㗎?」我問。

「其實都唔可以話我炒,我係俾人炒嗰個。」

「哦?」

「石澳咪有隻連續灣,中間有個凹位嘅。」





「嗯。」

「我轉緊入去嗰陣,有架Golf 追住架CLA,結果架Benz過到,架Golf 直接推頭指埋嚟。」

「係。」

「好彩我轉得快喳,唔係就唔係炒落尾沙板,係直撞埋司機位,到時我就真係收皮。」

「嘩,咁都好好彩㗎喇喎,淨係少少傷,咁架車?」





「Tol 咗啦~」Chris 一面無奈咁講。

「慘 as fuck。」

「不過我咁嘅款暫時都揸唔到車㗎啦,哈哈~」Chris 揈住裂咗嗰隻手講。

送咗佢哋兩姊弟返歸,我同堯姐就返咗屋企hea。







第二日晏晝,我同阿爸又嚟到耀哥嘅車房。

「搵我同個仔嚟又有咩搞呀?」

「幫手拆嘢囉。」

「吓?又要拆咩呀?你架車又有嘢壞呀?」

耀哥指咗指車房入面。

「嘩⋯⋯ 咩嚟㗎⋯⋯?」

「咩呀,DC2都認唔到呀?」

「屌啦,哩啲人哋唔要嘅爛鐵嚟喳嘛?」





的確,今次哩部DC2同上次嗰部唔一樣,今次哩部無頭尾燈,無頭尾泵把,無尾翼,啲油就一撻撻咁。

「喂,你唔好睇唔起佢喎,我check 過個車架無乜銹㗎喎。」

「咁你都唔係買哩架呀嘛,又唔係無啲正正常常嘅盤,哩架你拎去後面街搵收爛銅爛鐵嗰條友算啦。」

「放心喎,我買多咗兩部零件車,仲要加埋嘅錢都唔洗平時買一架咁多,咁我慢慢手砌一架出嚟啦。」

結果我哋三個開住着手研究哩架未揸到出街嘅DC2。
已有 0 人追稿