埋舟: 第零日
第零日
「目標確認。」
「好，發射。」
「目標已確認中槍，而家進行捕捉。」
「已經成功捕捉第十七人，行動結束，而家轉移佢哋去Island P。」
在漆黑寧靜、空無一人的街道內，一幫穿上潛行裝的團夥已經活捉了十七個人，正乘直升機往他們口中的Island P進發。
「好，計埋我哋呢十七個人，連埋之前我哋捉同埋其他team活捉嘅，啱啱好夠一百個人，今次可以話係有史以嚟最盛大嘅一場遊戲。」其中一個潛行裝的人說，他樣子相比其他成員來說顯得成熟，而且行動時還是由他發號施令為主，所以推測得出他是這團夥的領袖，他是One，這團夥均以號碼作稱呼，無人知對方的真名以及來歷，作用是保護整個團夥以至組織的安全和隱密性。
這組織由五個團夥組成，分別是以號碼作稱呼的Number Man，以字母作稱呼的字母眾，以地名作稱呼的地理老媚，以星體作稱呼的哥白尼，以及以動物作稱呼的百獸堂。每個團夥均獨立運作，偶然會做一些聯合行動，表面上非常團結，實際上權力鬥爭嚴重，互相敵視，同時又互相制衡，關係非常微妙。然而，五個團夥的領袖均十分尊敬整個組織的龍頭大哥Kami，所以儘管關係這麼緊張，但仍然相安無事。
「喂，新人，啱啱你開槍嗰時好似有啲騰雞喎，之前未揸過槍？」One對其中一個新人Five說。
「唔係，只係今次係第一次行動，有啲緊張失準啫，無下次。」Five冷酷的回話。
「哈哈，新人，唔駛咁緊張喎，大佬One又唔係要插你，佢出哂名nice，佢只係關心你渣，唔好睇佢個樣咁嚴肅，其實暖男嚟。」說話的是正在駕駛直升機的Two，看情況，似乎是這團夥的第二把交椅。
「喂，Two！你講得太多喇，咁樣啲人會越嚟越唔尊敬我㗎，專心打，唔係，專心揸飛機喇你！」One板起臉故意裝得很凶惡的說，全機的團員見狀完全不給他臉子，紛紛捧腹大笑，氣氛樂也融融。
機上團員由Zero到Eight總共九人，已經是整個團夥的成員齊集，相較另外四個團夥，Number Man顯得很弱勢，不過由於九位成員也抱著獻身的想法去做事，使他們成為組織中辦事效率和賺錢能力均排首位的一團，亦因此成為眾矢之的。
「已經見到Island P，我哋要準備降落。」Zero向大伙說，他是副機師。
「Island P，Number Man請求降落，Number Man請求降落。」Two用無線電和Island P的控制室聯絡。
「呢度係Island P，Number Man，你哋可以用四號停機坪，重複，你哋可以用四號停機坪。」控制室回話。
「Roger that。」Two回答後就往四號停機坪飛去，慢慢降落在大大的H字上，不偏不倚。
「好，將最後十七個參賽者運去參賽者準備室先。」One再次發號司令，團夥收到命令後便照做，而One則往會議室走去。
「One，辛苦你，大家為佢鼓掌，快啲！大力啲！有你出手我真係放心哂。」坐在會議室主席位，年輕俊俏的Kami帶頭熱烈歡迎One。
「客氣喇Kami，我只係盡力做好你吩咐嘅嘢啫，唔敢受咁厚禮。」One對Kami必恭必敬。
「犀利啦One，又領功喇。」Z言語間帶點不滿，他正是字母眾的領頭人。
「唔好咁啦，Z，做人大方啲，我哋都係幫Kami做嘢，無話領唔領功嘅。」月亮，哥白尼的領袖嘗試緩和氣氛，但Z依然一臉不滿。
「月亮，有啲嘢就唔可以咁講嘅，人最少係佢哋，但每次分得最大份嘅都係佢哋，叫人點服？今次我就撐Z喇。」雷克雅未克反駁月亮，他正是地理老媚的頭領。
「你哋都一人少句喇，係咪想Kami發火？」黃麂說，她是百獸堂的首領。
「好喇，你哋每次見面都係咁熱鬧，感情真係好，哈哈。」Kami開心的說：「今次咁急叫你哋捉一百個王家欣嚟，係因為我哋收到人口控制局嘅委託，要暗地裡用唔見得光嘅手法去解決人口過盛嘅問題，game交畀我哋諗，唔可以上佢哋身，事成收錢，就係咁簡單。」
「咁點解要揾王家欣？」月亮問。
「因為我哋每個人，人生入面總會識幾個家欣，根據非正式統計，一個人喺人生入面，平均會識4.75個家欣，而王係大姓，所以叫王家欣嘅人都特別多，男女老幼都有，所以為咗個game好好睇睇，特登抽寫法係『王家欣』嘅人出嚟，試下水温，睇下邊個係最值得留低嘅王家欣，係咪咁呀Kami？」One分析推論道，而Kami也點頭表示認同。
「咁我哋玩咩game？」黃麂問。
「我本身已經有個諗法，但都想聽埋大家意見，再投票決定玩咩game。」Kami是個奉行民主的人。
「捉伊因覺得點？」雷克雅未克提議。
「我覺得埋舟會好玩啲。」Z陰森的笑說。
「埋舟？你有咩高見呀Z？」Kami好奇的問。
「有無人唔知埋舟點玩先？」Z問完稍為停頓，看一看各人反應，看見雷克雅未克和黃麂搖頭表示不懂，他便由零開始解釋：「埋舟首先要定咗一個位喺用嚟埋舟，然後由一個人負責捉，其他人負責匿埋伺機行動。捉嗰個要揾到匿埋嘅人，然後跑返埋舟嘅位掂住大叫『打沉邊個邊個』，而匿埋嘅就要喺被打沉之前跑去埋舟嘅位掂住大叫『埋舟』。埋舟嘅人數越多，伸延開去嘅人鏈亦都可以畀人埋舟，最後睇埋舟嘅人多定被打沉嘅人多而決定勝負。」
「但我哋有一百個人，點控制？」月亮問。
「我已經諗好我哋版本嘅埋舟係點玩，會有埋心理搏奕，肯定更加刺激同埋精彩……」Z興奮的說。
經過Z約莫半個小時的解說和問答，在座六人一致決定今次的遊戲是埋舟，而準備功夫亦同步進行，遊戲定於明天十二時開始，各人分好工後便解散回自己的營地。
「大佬One，今次我哋負責做啲咩？」Zero問，他是這團夥的大腦。
「今次我哋做嘅嘢好簡單，就係喺南區做好佈置，確保無死位，同時守住唔好畀人逃走。」One向眾團夥說。
「知道！」眾人令命。
「仆街喇！大佬One！」Five此時由營外衝入來。
「大佬One無仆街，做咩事咁驚青呀新人？」One問。
「有一個……有一個參賽者，佢……佢好似瓜咗。」Five上氣不接下氣的說。
「咩話？快啲帶我去睇吓。」One著急得很，三步併作兩步，跟隨Five往參賽者準備室跑去。
「就係呢個，佢無咗呼吸。」Five驚慌的指著軟攤在地上的其中一個男性王家欣。
One檢查後，臉色一沉，著Five不可對任何人提起此事，並盡快處理好屍體，而他則想辦法蒙混過關。
一小時過後，Five再次回到營地，屍體已經妥善處理，此時One向大家宣布他的解決辦法：「大家都知我哋個record係幾咁靚，從來無差錯，但今次竟然發生咁嘅事，所以為咗我哋Number Man個朵，我決定搞一次抽籤，抽中紅色數字四嘅人就要去扮王家欣參加聽日場遊戲，但係由於我同Two佢哋一定認得出，所以我哋豁免，由你哋剩低嘅七個抽，我已經叫Zero準備好。」
此時Zero拿著預先準備好的紙出來，交到One手上，由One搞和後再逐一上前抽。
「好喇，新嚟新豬肉，我哋由新人開始公開先。」One宣布。
Five慢慢打開紙條，每一層彷彿像承受著一百公斤的啞鈴般重，兩層打開後，紙條正中間正正用紅筆寫著「四」字，Five嚇到跌坐在地，心跳加速，而其他六人則歡天喜地、手舞足蹈。
「好喇新人，多謝你今次為我哋嘅付出，記住小心唔好死。」One對Five說，然後轉而對Zero說：「Zero，幫佢催眠，直到遊戲完結之前，佢都要係王家欣！」
「但係One，我唔掂嘅。」Five嘗試求情，希望One回心轉意。
「Five，記唔記得我哋Number Man宗旨？係『全力獻身，無悔今生』，今次你抽中一個好機會，要好好表現，我會論功行賞。」One邊說，邊推著Five往Zero的醫療室。