又過了兩天,Suki回到報館,發現總編輯從澳門事件的第二天開始,已經沒有上班,所有人也找不到他。

Suki把總編輯隱暪毛里平與鐡漢的誤會,並在酒店意圖侵犯她的事告訴上級。有見事態嚴重,加上無故曠工,報館即時解顧了他,並升了Suki做總編輯。

兩星期後,鐡漢完成肥精新片的拍攝,正式約見了毛里平,二人一拍即合,鐡漢非常喜歡毛構思故事的能力和創意,立即聘請了他,薪酬除基本底薪外,每次集體度故事或完成每一稿劇本,都會有額外酬勞,收入比寫影評更優厚。

毛里平最滿意不是收入多了,而是可以再當編劇,再次成為電影圈的局內人。

他知道自己始終還是喜歡能發揮創意的工作。





本來鐵漢不介意毛繼續寫影評,但毛不想再做身痕——那個任意踐踏電影人心血的局外人。

******

餐廳內,其中一檯坐著兩位愛情、事業俱得意的幸運兒。

「身痕,恭喜你成為大編劇,飲杯!」

「Suki總編輯,以後唔好再叫我身痕,我唔會再寫影評啦,亦唔會再用呢個筆名,以後寫劇本我會用返真名毛里平。」





「咁我以後叫你做毛BB囉!」

「嘩……咁我駛唔駛叫妳總編輯BB呀?」

「唔使!叫我超級美少女總編輯BB就得㗎啦!」

「有無長啲呀?」

「男人唔係鍾意長嘅咩?」





******

一年後,鐵漢新片《香港仔重案組》首映禮。

影院內銀幕前的舞臺上,鐵漢於新片放映前,與座上出席首映禮的嘉賓分享拍攝經驗。

鐵漢:「呢幾年我拍咗唔少戲,但全部都係為大陸市場而拍,唔係咁受本地觀眾接受。但我都係一個土生土長嘅香港人,所以今次自導自演嘅《香港仔重案組》係特別為香港觀眾而拍,講一個華富邨出身嘅重案組探員,點樣喺貪汚嘅上司阻攔下,追捕一班由大陸嚟嘅悍匪,更多得政府嘅協助,全部動作場面都會喺香港嘅著名景點實景拍攝。雖然今次劇情涉及警察貪汚,未必可以喺大陸上映,但好彩我有國際市場,初步賣埠成績非常理想,外地買家仲話呢套戲重現返港產片嘅活力,唔再係千篇一律嘅合拍片。今次可以拍返純地道港產片,全靠幫我寫劇本嘅新晉編劇毛里平,我哋請佢上嚟同大家講幾句話。」

毛走到臺前,第一次站在數百位觀眾面前演講,不禁有點怯場。

毛:「各位好!我叫毛里平,大家可能對我比較陌生,其實我都已經唔新㗎啦,做咗編劇呢行都好耐啦,不過《香港仔重案組》先係第一部出我名嘅作品,希望大家會鍾意。我哋呢部戲同市面上其他所謂港產片好唔同,主角雖然正義,但都有人性嘅黑暗面,唔係無血無肉嘅樣版。戲裡面亦有貪污嘅公務員、對市民不禮貌嘅警察、對香港人造成滋擾嘅內地遊客。仲唔會無端端加插大陸演員做主角嘅女朋友、家姐、細妹咁突兀。戲中亦都有提到係公安能力低,先令到悍匪可以拎重火力軍火嚟香港犯案。總之戲中嘅香港,係香港人認知嘅九七後香港,唔係上面「河蟹」咗嘅香港。而家好多合拍片都會有香港同大陸人聯合編劇,但問心嗰句,咁係唔Work㗎!實有文化差異,出嚟劇本只會四不像!話無文化差異就呃你嘅,佢哋一隻字都少幾劃㗎!都係唔阻大家睇戲,Enjoy!」

現場響起如雷掌聲。

回到座位的毛,向身旁的Suki說:「一年前真係無諗過會有今日,真係好開心呀!」





Suki:「我一早知你叻仔啦,唔係點會揀你呀。」

毛:「妳都好叻女啦,由妳做咗總編輯後,妳哋娛樂版爆咗好多單勁料喎,出晒位啦!」

Suki:「唉……不過唔係老總搞成咁,我都唔會咁快升到總編輯呢個位。老總仲傻到喺大陸嚴重傷人㖭,搞到而家要坐監……」

毛:「殊……唔好講啦,開場啦!」