嗰個人聽到鐵門閂上嘅聲音後並冇回頭,夏巧莘走向左邊嘅長櫈
夏巧莘企喺長櫈旁邊,嗰個人坐喺櫈嘅左邊
「凌御生你喺度做咩?」夏巧莘企喺一邊望住佢,喺佢旁邊仲放住咗佢個書包,「你走堂啦?」
「明顯係。」凌御生微微抬起頭望夏巧莘,「你上嚟做咩?」
「Miss Li叫我去拎功課簿,一拎起就小息,又唔想咁快番課室,咁咪上嚟囉~」夏巧莘騰出一隻手,繞到臀部,將條裙掃下先再坐,疊功課簿放喺右邊
「哦…」凌御生微微點頭,然後又望向前面
「你番嚟但又要走堂,為咩啫?」夏巧莘望向凌御生
「喺屋企都冇嘢做㗎啦。」凌御生側住身子向夏巧莘坐,將右腳曲着成7字形咁放喺長櫈上,右手放喺椅背上然後托住頭,「唔似你地呢啲乖學生番嚟係為聽書。」
夏巧莘望住凌御生,諗起嗰日佢話「大家都係各取所需」,但宜家問好似唔太好
「呢度小息會有人上嚟,你唔驚比人見到你同我一齊呀?」凌御生似笑非笑咁笑咗一下


「都Kiss過啦…見到我同你一齊有幾閒?」夏巧莘同凌御生對望着,然後好似睇化咗一樣露出微笑
凌御生冇出聲,只係無奈咁笑咗一笑
此時夏巧莘忽然留意到喺凌御生嘅左邊臉頰骨上瘀咗一塊
「你呢度瘀咗嘅?」夏巧莘指住佢嘅左臉頰
「哦,嗯…係呀~」凌御生伸手摸落自己嘅左臉頰骨上,輕輕一笑,「琴晚比你細佬打咗一拳…」
「佢做咩突然出手打你?」夏巧莘嘅聲線有少許擔心,輕皺起眉頭
「因為佢覺得我趁佢家姐醉咗嗰陣抽佢家姐水囉~」凌御生望住夏巧莘講
「原來係咁…」夏巧莘突然明白咗乜嘢咁點頭,「難怪上到車之後佢問我同你係咪你情我願啦~」
「咁你同我真係你情我願喎,只係佢唔信咋嘛~」凌御生聳聳肩
放喺裙袋嘅手機突然震咗一下,夏巧莘拎咗手機出嚟睇


「今晚你唔洗番嚟開工,今個星期你都冇休息過,今晚休息下啦!」
突然收到酒吧老闆嘅whatsapp話唔洗開工,夏巧莘回咗一個「okay~」
「今晚又突然唔洗番工~」夏巧莘收起手機
凌御生突然間若有所思咁靜咗落嚟,當佢再開口嗰陣就講咗句:「你有冇諗住辭職唔做呢份工?」
「如果我有得揀,我都唔會做呢份工…」夏巧莘苦笑道,「但冇辦法,急住要錢…」
「但宜家你有我。」凌御生一臉認真咁講
「用你嘅錢始終唔太好嘅,外快囉~」夏巧莘搖搖頭
「到底你要幾多錢呀?」凌御生問道
「45萬…」夏巧莘耷低頭苦笑,雙手緊握着
「你要點多錢做咩?」凌御生唔理解


「我媽有急病,胃癌…要錢醫…所以…」夏巧莘嘅眼眶瞬間泛紅,「屋企只有我同我細佬,我係屋企嘅支柱嚟…只要番多幾日工,就可以㗎啦…!」
「加油…」凌御生伸手摸摸夏巧莘嘅頭安慰道
凌御生見到女仔嘅眼淚,心中特別手足無措,因為唔識講溫柔嘅說話去安慰
「嗯…」夏巧莘微微一笑,佢嘅笑容總係如此溫柔
夏巧莘抬手望一望手錶,距離小息完結時間仲有10分鐘
「你呢~到底點解會有咁多錢?你真係有錢仔嚟㗎?」夏巧莘側着頭問,夏巧莘講咗自己做陪酒嘅原因,咁凌御生唔會唔講啲咩掛
「個個都話女仔中意交換秘密,原來係真。」凌御生托住頭,好似認證咗其他人口中講嘅嘢一樣
「公平啲嘛~」夏巧莘吐吐舌頭笑一笑
「我屋企嘅背景同一般人有啲出入…所以好容易就可以有一大筆錢。」凌御生似乎都冇咩話介意唔介意,但講出嚟嘅說話卻婉轉了
夏巧莘聽到凌御生話自己屋企背景同其他人唔同,琴晚夏學謙講嘅說話喺腦海中即刻閃過
「佢屋企同黑幫有關…」
「屋企入面冇人管我,所以…亂Fing錢都唔緊要。」凌御生伸咗個懶腰,然後又繼續托住頭坐
「做嘢太忙?」夏巧莘咁樣問,心中有啲好奇佢屋企係咪真係同黑幫有關
「嗯。」凌御生點頭,然後又輕輕一笑,「冇人管都唔錯呀~」
佢講嘅呢句傳入夏巧莘嘅耳中,夏巧莘突然有少許覺得凌御生有啲慘



IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link