怕凌御生比人搶走,怕自己冇得再繼續獨佔凌御生嘅溫柔同吻…
凌御生街到上嚟天台,推開天台嘅門,望到夏巧莘企咗喺鐵絲網前面
凌御生好想跑上去,一下子將夏巧莘抱緊,同佢講除咗佢之外,自己唔會接受任何人…
「夏巧莘!」凌御生大步大步咁街到夏巧莘旁邊側着頭望佢
「你喺度嘅?」夏巧莘頓時擠出笑容,「你唔係喺樓下㗎咩?嗰個女仔…」
「拒絕咗啦~」凌御生笑起嚟,手插入褲袋
夏巧莘聽到之後,心中嘅不安突然全都消失,原來佢拒絕咗個女仔
「點解拒絕呀?個女仔唔好咩?」夏巧莘心中默默歡喜,但為咗唔好暴露自己嘅心情都要循例問下
「唔夠我嘅曖昧對象好~」凌御生開玩笑講道,但喺呢個玩笑中卻藏咗真心,「佢同校花邊有得比?」
「我又唔係你女朋友,我地係曖昧對象咋嘛~」夏巧莘甜甜地笑道


望到夏巧莘又開心番,凌御生頓時都鬆咗一口氣
「嚟緊今個星期四咪放假嘅~你有冇嘢做呀?」夏巧莘問道
「冇呀,做咩?」凌御生疑惑咁望住夏巧莘
「我想去迪士尼挽呀,但係呢我細佬一定會嫌低B唔同我一齊去。」夏巧莘嘟起嘴,「所以咪想問下你囉~」
「可以呀,去囉~」凌御生毫不猶豫咁答應咗,「陪你去低B一日囉~」
「嘻…」夏巧莘天真咁笑咗一笑,然後伸出手指尾,「咁約定你㗎啦!」
「好!」凌御生伸出手指尾同夏巧莘作出承諾
夏巧莘上堂嗰陣心中都喜滋滋的,一諗到星期四同凌御生一齊去迪士尼就覺得好開心好期待
「唔知咁樣算唔算係約會呢~」夏巧莘嘅心中甜絲絲的,就算係偷偷諗一下都覺得好開心,「希望快啲到嗰日啦~嗰日著咩衫好呢~」
夏巧莘諗起啱啱嘅表白現場,心臟都緊縮咗一下,但好彩凌御生拒絕咗嗰個女仔


「我啱啱會唔會好明顯呢…」夏巧莘托着下巴,望住筆記本發呆,「佢會唔會察覺到我唔開心呢…」
但望到呢個場景,心中真係唔太好受,本來以為自己可以忍得住,豈料最後都係忍唔到
但係夏巧莘萬萬都估唔到,凌御生會追上嚟,但同樣係因為咁樣,夏巧莘知道自己喺呢個男仔心中有啲地位
喺隔離課室嘅凌御生,正比鍾家豪望住偷笑
「笑咩啫?」凌御生望向鍾家豪
「你係咪中意人啫?啱啱咁緊張…」鍾家豪故意唔講明係邊個,淨係細聲咁問係咪中意「人」
「咩呀…」喺凌御生嘅腦海中淨係閃出夏巧莘剛才急步離開現場嘅畫面,「我都冇話中意夏巧莘…」
「我都冇話你中意夏巧莘,我冇講你中意邊個喎~淨係問你係咪中意人咋嘛~」鍾家豪笑起嚟,凌御生嘅耳朵紅起嚟,「你怕醜呀凌御生?」
鍾家豪笑到停唔到,凌御生都唔知嬲好定點
「我竟然會見到你怕醜呀凌御生!係怕醜呀!」鍾家豪仍然笑緊,佢捉住凌御生嘅手臂,「哈哈哈哈…!」


「收聲啦仲笑…」凌御生拎起放喺枱上嘅功課簿打落鍾家豪嘅額頭
「我就知道你冧佢㗎啦!」鍾家豪忍住笑,避免又比凌御生打,「啱啱咁緊張,人地一走就扮唔係追上去咁追…」
「你幾時咁八卦㗎鍾家豪?」凌御生嘅心事被看穿,盯着鍾家豪
「我係關心兄弟,唔係八卦。」鍾家豪伸手搭住凌御生博頭澄清道,然後又點點頭,「佢係幾好嘅~完美~」
「嗯哼,我知佢好。」凌御生細聲講道,好似係自己同自己講嘢咁
「佢知唔知你冧佢?」鍾家豪問道
「唔知,我地一直都係曖昧關係,唔會講中意唔中意。」凌御生一副理所當然咁講
「咁可能佢都中意你呢~我認真講句,我覺得佢同你真心幾襯㗎~」鍾家豪收起笑容,認真咁講道,「再講,其實佢都應該對你有感覺嘅,總之要我幫你嘅同我講,我一定幫你。」
凌御生嗯咗一聲,然後若有所思咁托住頭
其實凌御生覺得宜家呢個曖昧嘅關係唔差,可以留喺夏巧莘嘅身邊,又唔怕講咗心意之後發現係自己一廂情願

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link
已有 0 人追稿