[愛情走糖故]兩個人心底中不為人知嘅秘密,成為兩個人間嘅牽引: 47.灰熊山谷

經歷咗成個鐘頭嘅車程，終於嚟到迪士尼樂園
兩人出咗閘之後就向住迪士尼嘅大門進發
今日果真比較少人，兩個人拎住全年證就行咗入去迪士尼內
夏巧莘拉住凌御生行去拎咗一份地圖，然後一下子打開地圖
「你想挽咩呀？」「你想挽咩？」
兩個人異口同聲咁講道，佢地似乎都比自己同對方嘅默契嚇咗一嚇，但好快又笑起嚟
「你想挽咩先呀？」凌御生從夏巧莘手上接過地圖
「我地…」夏巧莘望住地圖，「順住去挽啦～我地宜家喺…呢度！」
夏巧莘指住佢地宜家嘅位置，佢地宜家喺小鎮大街入口位置
「我地喺入面挽番出嚟呀～」夏巧莘自然咁就捉住凌御生嘅手臂


「好呀。」凌御生點點頭，完全順住夏巧莘意
兩個人穿過小鎖大街， 前方嘅睡公主城堡映入眼簾，夏巧莘跑到前咗幾步，拎出手機，將睡公主城堡嘅美拍下收藏
凌御生冇跟住夏巧莘跑，反而行喺夏巧莘身後，望住夏巧莘嘅背影，偷偷咁擰出手機，將夏巧莘嘅背影連同睡公主城堡一同拍下，留喺手機中成為回憶嘅一部分
呢個時間係迪士尼啱啱開嘅時間，所以人流唔太多，所以喺照片中就只有夏巧莘同城堡
「凌御生！」夏巧莘擰轉頭望向凌御生，對住佢招招手
凌御生自然咁將手機塞番入褲袋，然後小跑到夏巧莘身邊
「行啦行啦！」夏巧莘甜甜咁笑
兩個人冇穿過睡公主城堡，向幻想世界走去，反而向左邊走，穿過咗探險世界去到灰熊山谷
「我地挽嗰個呀！」夏巧莘指住一個喺眼前高速飛過嘅列車
「一嚟就挽極速礦車呀…？」凌御生望住眼前呢架列車嘅速度呆咗一呆


「你挽唔到呀？」夏巧莘雙手放喺後面，側着頭望凌御生
「唔係，只係一嚟就要挽呢個…有啲刺激…」凌御生無奈一笑，「我怕你挽唔到咋～」
「我先唔會挽唔到，我今日諗住挽晒所有機動遊戲㗎！」夏巧莘笑一笑，然後就拉住凌御生跑向極速礦車嘅入口
今日好人數好少，平日就算係朝早都一定會見到有大量嘅遊客喺度，成個樂園人山人海咁，挽一個機動遊戲都要排長龍
但因為今日人數特別少，所以要挽機動遊戲根本就唔難，排隊都冇咩人
夏巧莘捉住凌御生嘅手腕，拉住凌御生喺排隊處嘅尾走到頭，前面有幾個人排緊隊
工作人員指示佢地行去綠色嘅閘前等待列車番嚟
「坐邊卡好呀？」夏巧莘問凌御生
「第三卡囉～」凌御生指住前面尚未有人嘅第三卡閘門前
上一架礦車番嚟，列車停穩後上一批乘客喺另一邊離開，夏巧回頭望一望凌御生，凌御生笑咗一笑


綠色嘅閘門緩緩打開，佢地行到去第三卡中坐低，將隨身物品放喺腳嘅前方，然後將安全扣拉咗落嚟
「驚唔驚呀？」凌御生細聲問道
「小小，個心跳得好快！」夏巧莘嘅手按喺左胸前
工作人員行到過嚟檢查，將安全扣再用力一壓一下，所有人嘅安全扣都檢查好晒之後，最後一個步驟就係等待礦車出發
礦車緩緩開動，一離開咗站內之後就轉彎落斜，轉咗入一個山洞之中，但好快又離開咗山洞，稍稍轉咗一個彎之後就慢慢上斜
「好驚呀好驚呀好驚呀…」夏巧莘輕輕咬唇低聲講道
「驚就捉住我。」凌御生柔聲講道
「嗯嗯！」夏巧莘點點頭
礦車上斜入到漆黑嘅山洞中，遇上咗可愛嘅灰熊
「好Q呀～」夏巧莘拍拍凌御生嘅手臂
當礦車去到山洞嘅中段時突然加速，離開山洞之後喺荒地之中穿梭，上到半山腰嘅時候突然停咗落嚟
夏巧莘知道大概礦車要向後跌嘅時候，伸手捉住咗凌御生嘅手臂
「呀！！！」時機剛剛好，夏巧莘一捉緊咗凌御生之後，果真成架列車向後跌，番到去原來嘅山洞之中
礦車喺山洞之中停咗一停，然後再次向前衝，今次嘅個衝力比上次更強更快
夏巧莘忍唔住就嗌咗出嚟，手亦不自覺咁直接拖實咗凌御生嘅手



IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link