[愛情走糖故]兩個人心底中不為人知嘅秘密,成為兩個人間嘅牽引: 49.情侶飾物

夏巧莘同凌御生兩人去到明日世界，挽咗太空飛碟同極速穿梭，最後去咗挽Iron Man飛行之旅
「我地係咪挽晒啦？」凌御生喺袋中拎出地圖打開
「嗯嗯！」夏巧莘望住地圖點點頭，然後抬頭望向凌御生，「我地不如周圍行一陣，然後晏啲再挽。」
「好呀，出去小鎮大街行？」凌御生摺起地圖，收番入袋中
「好呀好呀！」夏巧莘用力點頭
凌御生一手拖住夏巧莘，一手將斜孭袋嘅帶向下拉，將個袋放番去背後面
兩個人由明日世界行番出去小鎮大街，去咗鋪頭睇下行下
「呢個好可愛呀！」夏巧莘拎起一個粉紅色嘅頭箍，上面有隻豬仔趴喺度
「買囉～」凌御生望緊側邊其他頭箍
「我地一齊買呀！」夏巧莘拎住頭箍喺凌御生眼前晃了晃


「吓！？你唔係諗住一齊戴呀嘛…」凌御生一臉愕然
「嗯嗯！嚟啦！一人買一個啦！」夏巧莘點點頭，捉住凌御生嘅手臂懇求道，「我地都係喺迪士尼先戴咋嘛！」
「呃…」凌御生心中猶疑，望到夏巧莘雙手捉住自己手臂，一副可憐兮兮嘅表情，心中又唔捨得要佢失望，「好啦好啦！買啦買啦…」
「好耶～」夏巧莘頓時開心咁露出甜甜嘅笑容，「你要邊個呀？」
「你揀啦～」凌御生望到夏巧莘開心，佢都露出笑容
「咁買跳跳虎啦～好襯你～」夏巧莘滿心歡喜咁拎起跳跳虎嘅同款頭箍
「邊度襯我呀…」凌御生無奈一笑，夏巧莘調皮的吐吐舌頭笑一笑，然後行咗去掛住小公仔吊飾嘅架前
「呢個我地一人買一個好唔好呀？」夏巧莘拎住一對著住雨衣嘅Chip & Dale
「呢個好可愛喎～」凌御生頓時起了興趣，Chip著住黃色嘅雨衣，而Dale就著住鮮綠色嘅雨衣，「你要邊隻呀？」
「我要Dale！」夏巧莘將著住黃色雨衣嘅Chip遞比凌御生


比咗錢之後，夏巧莘將個頭箍戴到頭上，然後拎出手機，用手機嘅螢幕照一照
「好可愛呀～」夏巧莘笑一笑，然後收起手機回頭望凌御生，「你做咩唔戴呀？快啲戴啦！」
夏巧莘直接喺凌御生嘅手上拎走個頭箍，一下子就將佢戴到凌御生頭上
「好可愛呀你！」夏巧莘笑道，然後開咗手機中嘅相機，「快啲影張相啦！」
夏巧莘開咗手機嘅前置鏡頭，另一隻手另住Dale，凌御生微微彎腰遷就，手中拎住Chip，望住鏡頭微微一笑
「Save咗佢先～」夏巧莘甜甜一笑，除咗因為買到好可愛嘅嘢之外，仲係因為同凌御生有第一張合照，「我今晚send番比你呀～」
「好呀。」凌御生笑一笑道，「宜家你想去邊呀？」
「去邊都得啦～」夏巧莘笑一笑，「我地啱啱有冇坐小熊維尼嗰個車呀？」
「你講呢個呀？」凌御生指住地圖上寫住小熊維尼歷險之旅嘅角落
「嗯！我地去挽呀～去睇下～」夏巧莘點頭，兩個人就向住小熊維尼歷險之旅出發


行完挽完之後都只係2點幾，但整個樂園中嘅遊戲都幾乎挽過一次,兩個人仲諗緊可以去邊度挽
「好可愛呀真係～」夏巧莘拎住Dale公仔甜甜笑道，然後望一望凌御生，「番去掛喺書包先～你嗰隻呢？」
「啱啱放喺咩袋入面嘛～」凌御生將Chip喺袋入而拎出嚟，「你掛喺書包唔驚跌呀？」
「係喎，跌咗好可惜㗎～」夏巧莘鬆開咗拖住凌御生嘅手，喺褲袋拎出手機，將Dale放到相機嘅鏡頭前，「你嗰隻呢？快啲擺過嚟～」
凌御生拎住Chip放到夏巧莘嘅手旁邊，背景係睡公主城堡，夏巧莘輕輕掂咗螢幕一下，將Focus放咗喺Chip & Dale上，後面嘅城堡變得模糊，出現咗個景深嘅效果
夏巧莘用相機影完之後，打開IG
「唔好郁住…」夏巧莘提醒凌御生唔好郁，「喺Ig影埋先…」
用Ig嘅相機影完之後，畫面freeze咗一秒，然後變得清晰咗啲，夏巧莘用手指喺螢幕上向右邊掃，搵到叫Cairo嘅filter之後，將手機遞到凌御生面前
「睇下～靚唔靚呀？」夏巧莘甜笑道
「靚呀～你po close friend呀？」凌御生問道
「唔係呀～」夏巧莘將手機拎回自己面前，然後喺㩒左下角嘅圓圈時同時講道，「我po story呀～」

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link