[愛情走糖故]兩個人心底中不為人知嘅秘密,成為兩個人間嘅牽引: 76.我們算是什麼

夏巧莘冇出聲，安靜咁望住凌御生
凌御生坐番好，背脊貼住木椅背，露出一個似笑非笑嘅表情
「我係唔中意你呀，我只係想挽下你咋…」凌御生一臉冷漠咁講道，然後望住前方輕輕一笑，「你想我咁樣答你？」
夏巧莘無言以對，要講啲咩先啱？可以講啲咩？
「唔係。」夏巧莘微笑搖搖頭
「你係校花嚟㗎，對自己咁冇信心㗎咩？」凌御生伸手繞到夏巧莘嘅背，手搭喺佢另一邊博頭上，喺頭側邊㩒一㩒夏巧莘嘅頭，夏巧莘就側着頭靠喺佢嘅博頭上
「對住你特別冇信心…」夏巧莘輕閉雙眼，露出淡淡嘅笑容，微微勾起嘴角，柔聲道
夏巧莘㩒開手機螢幕，已經11點幾
「11點幾啦，聽日仲要番學呀！」夏巧莘溫柔嘅目光落喺凌御生身上
夏巧莘一望過去，凌御生就吻上佢嘅唇，夏巧莘一臉愕然，根本就來不及比反應


「嗯！番去啦。」凌御生笑一笑，心中喜滋滋的，又成功逗了夏巧莘一把
夏巧莘企起身將凌御生拉起，偷偷伸手挽住凌御生嘅手臂
凌御生冇甩開夏巧莘嘅手，喺心中默默歡喜，佢當然知道夏巧莘挽住佢嘅手臂唔係純粹想要扶住佢咁簡單，夏巧莘嘅主動令佢好滿意好開心
啱啱未完嘅話題，兩人都冇打算再繼續講落去…夏巧莘唔想聽到自己唔想要嘅答案；凌御生唔想講比夏巧莘知自己中意佢
「如果可以許個願，我希望我同你係相戀。」夏巧莘喺心中講道，微微耷低頭
喺微弱嘅燈光照射下，二人影子打喺地上，夏巧莘望住地面上嘅影，腦海中想着兩人嘅親暱行為
「如果你唔中意我嘅話，咁我同你之間…算係啲咩…」夏巧莘喺心中獨自失落，「比一個希望我之後再打沉我，有意思咩咁樣…」
夏巧莘沉默不語，雙眼只望住地下上嘅影子
深夜時分再配上昏暗嘅橙黃色街燈，令夏巧莘嘅心情莫名其妙的更差更難受
「明明就只係夜晚，做咩要營造一個咁憂傷嘅氣氛…」夏巧莘悶悶不樂地對自己嘅內心吐苦水


呢個時候心中突然出現咗一把聲音
「咁你想知道嘅咪直接問佢，同佢講清楚囉！」
「你係邊個啫…同你有關係咩？」夏巧莘喺心中問道
「我係你個心呀！點會同我冇關係？」居住喺夏巧莘心中嘅小精靈叉住腰講道，「你明明係中意人但又唔同人地講，你唔講佢點知你中意佢啫？」
「咁佢都冇講佢中意我，陣間…陣間佢話唔中意我咁點呀？咁咪變咗我自作多情囉…」夏巧莘輕輕抿唇
凌御生留意到夏巧莘嘅表情，一副滿懷心事嘅表情，令凌御生都不禁猶疑，其實佢係咪應該講心底話
「咁如果佢其實中意你，但同你一樣都係咁諗呢？你地一世都曖昧落去呀？」心臟小精靈問道
「曖昧都幾好呀其實…」夏巧莘開始安慰自己
「吓？你咁樣㗎咩？你明明就好中意佢！」心臟小精靈疑惑道，「我可係喺你嘅心臟入面呀！最清楚你諗咩！你厄唔到我㗎！」
凌御生忽然停下腳步，夏巧莘側側頭，一臉疑惑咁望住佢


「做咩呀？唔舒服？」夏巧莘瞬間就擔心起嚟，緊緊地捉住凌御生嘅手臂，「洗唔洗坐下？定要水呀？」
「唔係。」凌御生微笑道，搖一搖頭，「冇唔舒服。」
「咁…突然做咩呀？」夏巧莘更加疑惑
凌御生喺心中反覆問自己，係咪真係應該講心底話
呢個時候唔係一個好時候，縱使真係好中意夏巧莘，但係心中真係有遲疑…同時佢清楚知道，夏巧莘係一個咩人，同自己夾唔夾，要再遇到一個好似夏巧莘一樣令佢如此心動嘅人好難，或者已經唔可能再遇到，上天只會比一次機會…
對夏巧莘嘅心動有幾強，對佢嘅愛意有將深，凌御生自己最清楚不過…最怕就係喺呢個冇名份嘅狀態下，夏巧莘會比人搶走，就算再想留住都冇身份去挽留，呢個係凌御生最擔心嘅事…
「夏巧莘…」凌御生柔聲呼喚着夏巧莘嘅名字，夏巧莘嘅心臟頓時緊縮咗一下

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link