[愛情走糖故]兩個人心底中不為人知嘅秘密,成為兩個人間嘅牽引: 88.早己預備好的答覆

夏學謙再留咗一陣之後就離開咗墳場搭車番屋企…
坐喺床上諗番去今日去墳場嘅時候，終於見到生母，佢冇諗過自己有一日會親自去到墳場見自己嘅生母一面
到底係咪已經完全放低咗，唔再介意？夏學謙自己都唔知道
夏學謙拎出銀包，將mark低咗生母墓碑位置嘅紙仔放咗入銀包入面，然後將銀包放埋一邊，自己則行咗出去廚房煮嘢食
…
夏巧莘同凌御生食完飯之後，凌御生陪夏巧莘慢慢散步行番去
「今日嚇親啦，快啲番去休息下，你都攰㗎啦。」凌御生陪夏巧莘行到屋企樓下嘅時候講道
「你都係呀，你都受傷啦…」夏巧莘點點頭，「你都要快啲番去休息呀！今次係你番到屋企之後要whatsapp同我講啦！」
「調番轉啦宜家？」凌御生挑一挑眉
「宜家你有危險喎！」夏巧莘掐住凌御生嘅臉頰，「我當然要你報到啦！」


「人地唔知仲以為你係我女朋友啦！」凌御生輕輕一笑，捉住夏巧莘嘅手腕
「邊個要做你女朋友呀？」夏巧莘羞澀地鬆開手，撇開臉
「唔係你咩？」凌御生故意逗夏巧莘
「先唔係呀！」夏巧莘笑一笑，但好快又一臉凝重，收起咗笑容，抿一抿唇道，「喂…你唔會離開我㗎係咪呀？」
「吓…？突然講咩呀…」凌御生嘅眉頭輕輕一皺，露出淺淺嘅笑容
「好怕…身邊嘅人會一個一個咁離開我…」夏巧莘咬一咬唇，眼睛不安地移動，「你唔會離開㗎係咪呀…？」
眼前嘅夏巧莘同平日開朗活潑嘅佢好唔同，呢一刻由佢神情中可以睇得出佢嘅不安
「嗯，唔會離開。」凌御生堅定嘅一句令夏巧莘安心落嚟，「會一直喺度。」
「真係？」夏巧莘再三問道，「真係唔會離開我？」
「係。」凌御生毫不猶疑就回答


「嗯…但如果有一日你有女朋友嘅話--」「咁唔搵女朋友咪得，直到你搵到男朋友。」
凌御生聽到夏巧莘嘅提問之後，都係毫不猶疑咁打斷夏巧莘回答
「咁如果我到咗30歲都冇--」「我娶你。」
喺凌御生嘅眼神中，沒有絲毫嘅考慮同猶疑，好似係早就已經準備好答案一樣
夏巧莘喺心中默默高興，悄悄地心跳加速
喺旁人嘅耳中聽起嚟，同情侶間嘅話題冇咩太大分別
「放心未？」凌御生微笑問道
「嗯…」夏巧莘甜甜地笑，點一點頭，「咁我番去啦～你記得陣間--」
「番到去whatsapp你嘛！」凌御生無奈地笑道，「我知啦！」
「好啦，聽日見啦！」夏巧莘轉身前同凌御生揮一揮手講再見


凌御生照舊要等到夏巧莘入咗去升降機大堂先離開
送咗夏巧莘番屋企之後，凌御生都趕快番屋企，一打開門，凌天傲坐咗喺梳化
「生。」凌天傲企起身行到凌御生面前，「阿津話今日有人襲擊你，你有冇邊度受傷？」
「手，腰。」凌御生一隻手㩒住旁邊嘅櫃，另一隻手除鞋
一除完鞋之後嘅第一件事係拎出手機，whatsapp夏巧莘
「番到屋企啦！」
夏巧莘好快就係「上線中」
Ella BB：Okay~
凌御生報咗平安之後，直接就去咗沖涼
「阿津有冇查到啲咩呀？」凌御生喺廁所赤裸住上身行出嚟

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link