[愛情走糖故]兩個人心底中不為人知嘅秘密,成為兩個人間嘅牽引: 101.夏學謙與夏巧莘

夏巧莘嘅腦海中一片空白，唔知可以講咩嚟反駁
「我一直將你身邊嘅男仔都趕走，怕你會中意其他人，一直以嚟都係咁，直到佢嘅出現。」夏學謙口中嘅佢，係凌御生，「佢一出現，你就一步一步咁行咗去佢嘅身邊，我做嘅嘢都前功盡廢！佢一出現就搶走咗你，我真係唔可以接受你兩個成日形影不離！」
「我同你冇可能，我地一世都係姊弟。」夏巧莘吞咗一啖口水，堅定咁望住夏學謙，「而且我中意嘅人就只有佢。」
對於夏學謙嚟講，夏巧莘呢一句係重擊
「我同你一世都只會係姊弟。」夏巧莘嘅眼眶忽然濕潤起嚟，「我同你一齊長大，喺我眼中你永遠都係我細佬夏學謙。」
「我唔想做你細佬呀夏巧莘！」夏學謙一直抑壓嘅感情同情緒喺一刻間爆發出嚟，「我比任何人都中意你！除咗爸爸媽媽之外，我最了解你，我有咩比唔上凌御生？我咩都比佢好，一直喺係身邊嘅唔係我咩？你嘅依靠，你所依賴嘅唔係我咩？點解呀？我唔明嗰個凌御生有咩比我好！佢對你好，我對你唔好咩？」
「我同你係親情，點可以拎嚟比較？」夏巧莘皺起眉頭，喺眼神中流露出一絲憂傷
「我覺得我冇嘢比佢差！我有咩差過佢？」夏學謙唔甘心
「冇！你冇嘢差過佢！」夏巧莘嘅眼淚始終忍唔住，「但問題就係我同你係姊弟！」
「咁如果我地唔係姊弟呢？」夏學謙更用力捉住夏巧莘，幾乎係掐住佢嘅手


「都唔會！」夏巧莘搖搖頭，「你放手啦！」
宜家夏巧莘終於明白，點解夏學謙一直以嚟都唔中意凌御生同咁執著喺佢同凌御生嘅關係上嘅原因
夏學謙唔甘心，佢唔服，點解佢會輸比凌御生？
「你捉到我好痛呀！」夏巧莘伸手試圖推開夏學謙嘅手，「放手呀！」
「你係中意凌御生呀嘛？」夏學謙再問多一次，心底早就已經怒火中燒
「係！」夏巧莘大聲咁嗌道，淚水滑過臉頰，「我係中意佢！好中意佢！亦只會中意佢！」
夏巧莘用力甩開夏學謙嘅手，「呯」一聲閂上房門
夏學謙企喺廁所門口，心中真係好唔服，點解就係凌御生？點解夏巧莘中意嘅人係佢？點解自己要係佢細佬？點解？
夏巧莘伏喺床上低聲哭着，點解突然間會變成咁？16年姊弟，但係今日竟然話佢知，佢地根本唔係姊弟，同佢一齊長大嘅細佬唔係佢細佬，佢地其實一啲血緣關係都冇…
原來夏學謙係因為中意自己，所以先一直針對凌御生


夏巧莘嘅心不知所措起嚟，到底要點樣面對夏學謙先啱？
夏巧莘拎起電話，撥號比一個人
「喂？」對方接了電話先開口
「凌御生…！」夏巧莘抽泣着
「你喊呀？做咩呀？發生咩事啦？」凌御生瞬間著緊起嚟
「我唔知點算啦…！我要點樣面對夏學謙啦？」夏巧莘仍然哭着，床單上都因為眼淚而濕了一小片
「做咩啦？你地嗌交啦？」凌御生問道，「你要唔要過嚟呀？」
「都唔算嗌交…好似比嗌交嚴重啦…！」夏巧莘無力地坐喺床邊，抽抽鼻子，「喺屋企對住佢好尷尬，所以我喺房…」
「你要唔要出嚟呀？」凌御生問道，「我陪你。」
「嗯…」夏巧莘點點頭，嗯咗一聲


「陣間見啦，喺番嗰度。」凌御生講完就掛了電話
夏巧莘換咗衫，孭咗個袋就出去，夏學謙坐喺梳化發呆，都冇開口講咩
夏巧莘行到去相約嘅公園，見到凌御生已經喺度
凌御生見到夏巧莘嘅時候，緩緩企咗起身走向夏巧莘，夏巧莘小跑起嚟，走到凌御生面前，一下子就伸手攬住佢，又再哭起嚟

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link