[愛情走糖故]兩個人心底中不為人知嘅秘密,成為兩個人間嘅牽引: 103.關係緩和

夏巧莘行到門前打開房門，凌御生行入去，一閂上房門嗰陣，夏巧莘主動地攬住凌御生，頭埋喺佢嘅胸膛上蹭了蹭
凌御生輕輕伸手攬住夏巧莘，但佢覺得呢一刻嘅夏巧莘純粹係想要對佢撒嬌想嗲佢，因為就喺啱啱，佢一直以嚟嘅依靠講咗一個殘酷嘅現實比佢知，宜家嘅夏巧莘就好似一個被拋棄嘅小孩一樣，唔知搵邊個依靠先啱
每個人嘅心中都有一個一直依靠着嘅人，就算係成熟嘅人都總會有一個依靠，當呢個依靠突然消失，心中自然地會開始感到徬惶無助
凌御生喺心中知道，自己宜家係夏巧莘最後嘅依靠…
「唔好離開我…」夏巧莘收緊雙臂，將凌御生鎖喺身邊
「唔會離開。」凌御生嘅右手放喺夏巧莘嘅後腦勺，緊緊攬實佢，「我應承咗你唔會離開，我就唔會離開。」
「嗯…」夏巧莘乖乖點頭，喺凌御生嘅懷中總是覺得安全感滿滿
凌御生輕撫夏巧莘嘅臉頰，佢嘅手好溫暖，一碰上夏巧莘嘅臉頰同時將夏巧莘嘅心都溫暖着
凌御生感覺到夏巧莘嘅身體仍然微微顫抖着，呼吸有點急速，快而短的…佢知道以後對呢個女仔要加倍愛惜，見佢喊到梨花帶雨嘅嗰一刻，凌御生心中對佢就加倍憐愛
「成12點幾啦，去刷牙先啦！你都攰啦！」凌御生溫柔地微笑起嚟，「聽日陪你食早餐。」


「嗯…」夏巧莘點點頭，然後行咗出房去洗手間
夏巧莘番嚟就爬上床，黏住喺凌御生身邊
「好啦瞓啦～」凌御生瞓喺夏巧莘隔離
夏巧莘側身弓着身子瞓，或者因為已經喊到好攰啦，瞓低一陣夏巧莘就已經瞓着咗
凌御生見夏巧莘瞓着咗，輕手輕腳掀開被落咗床，輕輕打開房門出咗去，然後再閂番門
「老豆。」凌御生行到書房門前，書房嘅門打開着，凌御生邁步行入去，「到底查到啲咩？」
「我有懷疑嘅對象，已經叫咗阿津去處理。」凌天傲坐喺大班椅上，枱上放住一本書
「我唔係小朋友啦…你就唔可以同我講？」凌御生挑一挑眉
「嗯，我知道，你大個仔啦…」凌天傲揚起嘴角，輕輕一笑，「有想保護嘅人。」
凌御生沉默不語，凌天傲拎起放喺枱面嘅書合上，凌御生留意到枱面上嘅嗰本書


《在咖啡冷掉之前》，係媽媽最中意嘅書
凌御生見到之後眸色沉了下來，默默站着不一聲不吭
「呢本書你媽媽成日都話好好睇…」凌天傲望住枱上嘅書嘅時候，眼神中流露出一點傷感，「佢最中意睇呢本書…」
「嗯，媽媽成日都睇。」凌御生記起媽媽仲在世嘅時候，成日都拎住呢本書睇，輕輕一笑，「都唔知睇咗幾多次…」
「我最近終於有時間、有機會睇下呢本書…」凌天傲望住小說嘅封面，「入面每一頁都有你媽媽睇過嘅痕跡…」
「嗯…」凌御生輕聲嗯咗一聲
「阿生，遇到想要保護一世嘅人，就要盡力保護佢…屋企係黑幫對你嚟講，一定好大壓力啦…」凌天傲拎住本書緩緩企起身，行到旁邊嘅書櫃前，將本書放番入書櫃
「嗯。」凌御生點點頭，「我番去瞓先。」
「好。」凌天傲答道
凌御生行到書房門口嘅時候，忽然有啲猶疑咁停低咗，回頭望一望凌天傲


「你都…唔好咁夜瞓。」凌御生要打破同凌天傲之間嘅隔膜始終有難度，只係宜家嘅關係緩和咗
凌天傲聽見凌御生嘅話不禁有啲愕然，佢冇諗過佢個仔會講呢啲關心嘅說話，特別係對住佢講
凌御生行番入房，輕力關上房門，但佢冇上床瞓，佢直接行到窗檯，坐喺上面背靠着後面嘅牆，安靜咁望住外面

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link