[愛情走糖故]兩個人心底中不為人知嘅秘密,成為兩個人間嘅牽引: 128.他有點怪呢

凌御生自己都唔知道自己猶疑緊啲咩，真係只係因為怕夏巧莘會受傷？
呢一刻凌御生比唔到答案自己…
凌御生一直耷低頭走着，都唔知行咗幾耐，當佢一抬頭嘅時候，心中不禁愕然起嚟
宜家嘅佢正企喺夏巧莘嘅屋企樓下，佢都唔知自己點解會行咗嚟呢度，不自覺咁就行咗嚟呢度
但令佢愕然嘅，係嗰個企喺離佢不遠嘅地方嘅女仔
「你喺呢度嘅？」夏巧莘一臉疑惑咁望住凌御生
夏巧莘嘅手上拎住咗個裝滿零食嘅環保袋
凌御生咩都冇講，直接就邁步走向夏巧莘，一下子將夏巧莘緊緊地抱喺懷中
「做、做咩呀突然？」夏巧莘愕然地問道，手停喺半空之中
凌御生只係一聲不響咁攬住夏巧莘，夏巧莘見凌御生冇出聲亦冇再講啲咩


良久，凌御生先至放開夏巧莘
夏巧莘直盯着凌御生，期待佢會講咩一樣
但係凌御生咩都冇講，只係自己無奈一笑
夏巧莘又側一側頭，望住凌御生露出甜美嘅笑容
凌御生伸手輕撫夏巧莘嘅臉頰，夏巧莘因為凌御生突如其來嘅舉動而嚇到縮咗一下，凌御生嘅手插入夏巧莘嘅髮根
眼神迷離半秒之際，凌御生低頭吻向夏巧莘
夏巧莘心中覺得，今日嘅凌御生有啲奇怪，同平日嘅佢唔一樣
今日嘅吻比平日短好多，凌御生鬆開咗夏巧莘之後冇講啲咩，只係伸手輕輕摸一摸夏巧莘嘅頭
「番去啦。」凌御生講道
縱使喺心入面有啲疑惑，但夏巧莘都係點一點頭


推門入到大堂之後，夏巧莘回頭望向凌御生，然後笑咗一笑就番屋企
「今日凌御生咁奇怪嘅…？」夏巧莘踏出升降機時，一邊慢慢行番屋企，一邊自言自語道
凌御生喺夏巧莘入咗大堂之後就轉身離開
「呢個決定對我同你嚟講，或者係最好…」凌御生嘅指尖輕輕碰唇，細聲講道
翌日朝早，夏巧莘同夏學謙一齊出門口搭車番學
「今日隻腳仲痛唔痛？」夏學謙閂上屋企嘅木門，走向企喺升降機前嘅夏巧莘
「小小啦，但都已經冇琴日咁痛。」夏巧莘耷低頭望住自己雙腿，「拜託千祈唔好有疤痕呀～」
「你唔好成日整佢就唔會有疤。」夏學謙平靜咁拎住手機睇
兩個人等到巴士嚟就上咗上層坐，夏巧莘一直往車窗外望，期待陣間又見到凌御生上車
巴士過咗兩個站之後停落嚟，夏巧莘微微挺起腰板坐起，望住樓下上緊車嘅人


但今日卻見唔到凌御生嘅身影，夏巧莘嘅心不禁有啲失望
「佢會唔會係病咗呢？」夏巧莘突然喺心中問道，一諗到呢度，夏巧莘不由自主咁擔心起嚟，然後send咗個whatsapp message比凌御生
「今日唔見你嘅？病咗？」
夏巧莘將訊息發出去之後就鎖上螢幕，等待凌御生嘅回覆
「其實佢之前一直都有逃學，咁可能今日唔想番呢～」夏巧莘喺將訊息發出去之後又突然諗到呢個問題，「但係佢已經好一段時間冇唔番學㗎啦啵…」
夏巧莘一臉苦惱，夏學謙都睇得出夏巧莘有煩惱，但夏學謙冇出聲，只係默默將呢件事放喺心中
夏巧莘兩姊弟番到學校之後，夏巧莘到咗3樓就先行，而夏學謙就直上4樓
夏巧莘坐喺課室內托住頭發呆，放喺櫃桶入面嘅手拎住仍然未有訊息通知傳嚟嘅手機
「佢會唔會真係有咩事…」不祥嘅感覺喺夏巧莘嘅腦海中劃過，夏巧莘頓時坐好起嚟，拎起手機想再發訊息比凌御生，「但可能…佢真係唔舒服呢～」
夏巧莘嘅心中泛起不安嘅感覺，但呢種不安感好似冇根源一樣，佢都唔知呢種感覺從何而來

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link