[愛情走糖故]兩個人心底中不為人知嘅秘密,成為兩個人間嘅牽引: 137.顧慮，是因為我愛你

「你知道我對你係點㗎，你知我中意你㗎…」凌御生緊緊咁攬實夏巧莘，唔比機會佢走
「我愈嚟愈睇唔清你嘅心係點諗，我唔知…」夏巧莘搖搖頭，「你一時同我好親暱，一時又將我拒於千里之外，我唔知你想點…我早就已經唔知道我對你嚟講佔咩位置，有咩意義…」
到咗呢刻，凌御生先真正聽到夏巧莘嘅心底話，呢一刻佢先知道夏巧莘一直以嚟嘅想法
「我係真心中意你所以先有咁多顧慮，係我冇企喺你嘅立場上為你諗過，係我唔夠細心，但係對你嘅心意係真㗎。」凌御生嘅臉頰貼喺夏巧莘嘅頭邊
凌御生冇諗過原來夏巧莘係咁諗，因為夏巧莘從來都唔會講，但係同時凌御生亦自責係自己唔夠細心先冇發現到
「我知道你有苦衷，我亦可以體諒你，因為我想你知道我係一個可以同你分擔憂愁嘅人…」夏巧莘露出溫柔嘅微笑，嘴角微微揚起，「我知道你因為屋企背景而有壓力，所以我會想同你分擔多啲，什至想你知道就算有咩事都好，我都會喺你身邊同你一齊，但係你一次又一次咁推開我…」
凌御生莫名心疼，原來夏巧莘為佢諗咗咁多，但自己好似冇為呢個女仔諗太多
打着為佢好嘅旗號，但係其實從來都冇問過佢點諗，自把自為咁就代夏巧莘決定咗
「或者你真係講得啱…」夏巧莘嘅聲線裏帶着半點絕望，「我地真係兩個世界嘅人…」
凌御生有啲慌，呢一刻佢先明白夏巧莘嘅心情，原來聽到自己心上人親口講「我地係兩個世界嘅人」時，心中係咁難受…


夏巧莘推開凌御生嘅雙臂，抬頭直視凌御生嘅雙眸
「我冇介意過你咩背景，因為我係介意嘅話一早就走咗，點解你就唔可以對我有啲信心相信我多啲？」夏巧莘先苦笑道，然後再耷低頭然後溫柔地笑，「我地真係兩個世界嘅人嚟，但係我唔介意，因為既然中意你，我就想融入你嘅世界…」
凌御生有啲愕然到唔知講咩好，腦海中冇出現任何字詞
「對唔住，係我唔好…」凌御生耷低頭，心中滿滿的歉疚
「唔洗對唔住，我明白你有你嘅顧慮。」夏巧莘微笑道
夏巧莘嘅善解人意，令凌御生覺得夏巧莘簡直係上天比佢最好嘅禮物，上天直接派咗一個天使落嚟喺佢身邊
「我諗你都猶疑咗好耐㗎啦…」夏巧莘低頭微笑嘅瞬間，眼眶開始泛紅，「都夜啦～我番上去先。」
夏巧莘想要避開凌御生，佢只想番屋企冷靜一下，唔想再喺凌御生面前喊
夏巧莘轉身欲離開，凌御生伸手拉住夏巧莘
「夏巧莘，原諒我好唔好？」凌御生用力捉住夏巧莘嘅手腕，「我知道係我唔啱，我冇為你諗過，比多次機會我好唔好？我唔係唔信你，我係…我係唔信我自己咋！」


夏巧莘聽到之後，感覺到凌御生捉住佢嘅力度又加強咗，夏巧莘回頭望凌御生
「我怕我保護唔到你…今次你平安番嚟，但你知唔知我個心有幾驚，我好怕就咁就失去你。其實唔關你事，係我問題，你唔應該受呢啲苦…」凌御生搖搖頭，心中嘅每一處都因為夏巧莘而心疼，「我驚呀…我真係驚我冇辦法再保護多你一次又或者兩次，所以先要同你分開，我唔想你受到傷害。」
夏巧莘聽完之後心更難受，眼淚喺眼眶中打轉，喺眨眼一刻，豆般大嘅淚珠喺夏巧莘白皙嘅臉頰上滑過，流下一道淚痕
「我從來都冇後悔過喺你身邊…」夏巧莘嘅聲線顫抖着，「為你停留，我覺得值得，因為我中意你，所以可以停留喺你身邊，就算其他人講再多閒言閒語都好，我都唔介意！因為我揀咗你，我接受你嘅一切，你嘅性格、背景，任何嘢都好我都接受！」
夏巧莘忍着快要決堤嘅淚水，握緊了拳頭
「喺我同你相處嘅呢一段時間中，唔通你真係睇唔到我對你嘅決心咩！」夏巧莘喺講嘅同時一下子甩開凌御生嘅手
凌御生完全愣住，手停留咗喺半空懸着

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link