夏巧莘落到3樓,假裝一切都冇發生過一樣自然地行入課室,縱使夏巧莘聽到身邊嘅人都喺度議論着
「原來你地一早就一齊咗嘅~」嘉怡奸笑挪揄道
「咩呀…」夏巧莘忍不住笑意,抿着唇甜笑起嚟
「佢真係好型呀,喺所有人面前直接就公開,勁有型囉!」嘉怡一臉羨慕咁望住夏巧莘,「如果我第時個男朋友都係咁就好,我一定冧死!」
「先唔係囉!」夏巧莘無奈咁笑道
雖然口中就話唔係,但係事實上啱啱凌御生捉住自己嘅手然後直接表示自己係佢女朋友嘅時候,夏巧莘立馬就動心起嚟,心臟咚咚、咚咚的強烈跳動着
「估唔到佢對你咁情深喎~」嘉怡雙手捉住夏巧莘嘅前臂
夏巧莘托住腮,微微低頭望住枱上嘅筆記本,拎起原子筆,筆尖輕輕掂住喺筆記本嘅頁紙上,輕輕抿着唇
「宜家先唔答應住…陣間又反口推開我點算…」夏巧莘喺心中默默抱怨
隨着上課嘅鐘聲響起,老師踏入課室,夏巧莘亦整理好心情上堂


但喺隔離課室嘅凌御生坐喺座位,手輕蓋喺鼻同嘴上,心中嘅甜絲絲令佢無法忍住笑意
「你兩個唔係未一齊咩?咁快就當眾公開?」鍾家豪手上拎住支筆挽緊,望向凌御生
「咁大家兩情相悅,一齊都係遲早嘅事啦~宜家講定先都唔係咩問題啦~」凌御生心中嘅甜意更濃
「講到人地一定應承你咁,即係好有信心啦?」鍾家豪見到凌御生個自信樣,就知佢乜信心都番晒嚟,心中都鬆咗一口氣
「當然!佢唔應承我仲可以應承邊個呀?」凌御生自信地展露笑容
多虧劉子勤「幫咗佢一把」,令凌御生失去咗嘅自信心一下子就番晒嚟
「佢乖乖地等我表演啦~」凌御生自信地抬一抬下巴,「我今次係信心十足出戰㗎!」
「祝你成功啦咁就!記得請我食出pool飯呀!」鍾家豪伸出拳頭,凌御生同佢碰拳
「請你食10餐都得呀!」凌御生久違嘅自信笑容,鍾家豪見到都知佢勝券在握,「其實佢叫我再諗清楚啲。」
本來自信嘅笑容慢慢收回,一臉嚴肅,心中有種難以言喻嘅感覺


「佢可能怕你轉個頭又改變主意啫,佢咁講得即係在意你嘅想法啦!都係好事嚟。」鍾家豪左手拎住原子筆轉
凌御生諗起夏巧莘講嘅說話,瞬間又甜絲絲地笑起嚟
「佢唔會變咪得~」凌御生微微低頭,有半分羞澀地甜笑道
鍾家豪瞬間打咗個冷震,本來冇女都算啦,宜家仲要比人餵晒狗糧咁
每次見完夏巧莘嘅凌御生,一定會大方咁大撒狗糧,狗糧好似沒完沒了咁灑落嚟
放學嘅時候,凌御生比起夏巧莘嗰班早放,佢心中其實想去等夏巧莘同佢一齊番屋企,但無奈嘅係佢要夾Band,而且餘下嘅練習日子已經唔多,佢地必須要爭取時間練習多啲,以確保表演萬無一失
就算呢個係「屬於凌御生嘅表演」都好,鍾家豪、阿文,仲有軒軒都唔希望表演出一分差池,自己嘅部分都要以完美嚟配合凌御生
「喂!行啦!發咩呆呀?」雙手插喺褲袋中嘅鍾家豪用博頭撞凌御生
「冇嘢。」凌御生將書包拉鏈拉上,然後孭起書包就行
阿文同軒軒行喺前面講笑傾計,鍾家豪同凌御生行喺兩人嘅後面,凌御生冇乜講嘢,只係安靜咁望住佢地喺度打鬧,偶爾笑一笑


「做咩呀?想同人地一齊走呀?」心水清嘅鍾家豪一眼就睇穿凌御生

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link
已有 0 人追稿