[愛情走糖故]兩個人心底中不為人知嘅秘密,成為兩個人間嘅牽引: 150.神秘人

Ella BB：番到屋企啦

「人地搵你啦！」鍾家豪笑道，然後行開Tune音，「覆人機啦！」

凌御生喺看似無奈嘅笑容中夾雜咗甜意，然後行到梳化坐低回覆咗一句「okay」之後就將手機放咗入書包，接住落嚟嘅時間就要專心練習

夏巧莘番到屋企，心情又好番晒，呢個時候夏學謙啱啱買完餸，正準備從街市回家

「今晚食得簡單啲啦…」夏學謙喺心中喃喃自語



夏學謙心中突然覺得有啲唔妥，便停低落嚟回頭望，望咗兩秒之後夏學謙又繼續行

「唔通係我多心？」夏學謙喺心中問道，有啲疑惑

夏學謙沿路行番屋企，心中總覺得有人跟住佢尾，但每次一回頭後面咩人都冇

夏學謙冇行平日嘅路番屋企，反而兜遠路行，但嗰個人仍然跟住喺夏學謙身後

嗰個神秘人同夏學謙保持咗一段距離，冇行得好埋



夏學謙刻意加快咗腳步，嗰個神秘人都加快咗腳步，夏學謙喺呢個時候即刻急停然後瞬間擰轉身

嗰個神秘人比夏學謙突如其來嘅剎停殺咗一個措手不及，趕唔切匿埋

夏學謙一望過去，見到嗰個人嘅時候夏學謙愕一愕然，眼睛不禁瞪大咗一下

「你係邊個？做咩一直跟住我？」夏學謙嚴肅地問道，「我認得你係上次喺墳場嗰個人。」

本來嗰個人仲輕輕張鴨舌帽拉低咗，但呢一刻佢抬起頭望夏學謙



呢個神秘人望落都有40-50歲，有少少鬍鬚，都有啲男子氣概

「請問，你係識唔識張秀怡？」嗰個人問道

夏學謙有啲愕然，但冇即時回答，心中對呢個人有啲懷疑

「你係咪張秀怡嘅養子？」嗰個人再問道，夏學謙嘅眉頭一皺

「你到底…係邊個…？」夏學謙對眼前呢個人有啲提防，呢個人點會對於自己嘅事知道咁多？

「我想請你帶我去見張秀怡一面。」嗰個神秘人講道

「我都唔知你係邊個，做咩要帶你去見我媽媽。」夏學謙對佢始終提防

「我叫沈偉晉，呢個係我電話。」沈偉晉將一張寫咗電話號碼嘅字條遞比夏學謙，「你問清楚你媽媽之後再聯絡我，我等你電話。我只係想去見一見佢。」



夏學謙有啲遲疑咁接過紙條，嗰個男人再次戴上鴨舌帽，然後離開

沈偉晉，呢個突然出現但意義不明嘅男人，佢唔止識得張秀怡，仲識得楊美娜，到底佢係邊個…？

夏學謙將紙條放喺褲袋，番到屋企嘅時候都心不在焉

「到底佢係咩人？點解佢會識媽媽…？」夏學謙個腦淨係諗住啱啱嘅事

夏巧莘行入廚房，見到夏學謙心不在焉咁切緊菜，刀喺手指嘅上方準備再切落去

「夏學謙！」夏巧莘即刻嗌住夏學謙

夏學謙即時回神，將刀移開，然後回頭望夏巧莘



「你想嚇死人咩？人嚇人冇得醫㗎！」夏學謙皺起眉頭望夏巧莘

「我話你諗咩諗到入晒神就真呀！」夏巧莘一臉擔心咁行到去夏學謙隔離，「你啱啱差啲將自己隻 手指切咗落嚟呀！」

夏學謙冇出聲，只係默默地將未切好嘅菜放番去砧板嘅正中央繼續切

「你諗咩諗到咁入神呀？」夏巧莘拎住水杯企喺夏學謙隔離問道

「啱啱我去街市買完餸然後番嚟，有人一直跟住我尾。」夏學謙開口講，夏巧莘眉頭一皺，「去到樓下嘅時候，我問佢係邊個，佢問我係咪張秀怡嘅養子，然後叫我帶佢去見媽媽…」

「又會咁奇怪嘅？」夏巧莘疑惑地皺起眉頭，「會唔會係媽媽嘅朋友呀？如果係媽媽嘅朋友，咁知道媽媽個名同你係養子都唔出奇呀～」

「但更奇怪嘅係，上次我去墳場拜我親生媽媽，我喺墳場見過呢個人。」夏學謙諗起嗰日佢去墳場嘅時候，剛踏入去，就有一個戴住鴨舌帽嘅男人行出嚟

「會唔會係佢都去拜邊個咋？」夏巧莘都一齊諗



「呢個就係更奇怪嘅事，當我行到去我親生媽媽嘅墳前嗰陣，我見到有一扎啱啱先擺嘅花喺個碑上面。」夏學謙講道，「因為扎花有人淋咗水，而喺個墓碑前面嘅地方都係濕…」

「你懷疑，佢同你親生媽媽有咩關係？」夏巧莘問道




IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link