「喂,一陣一齊食飯,之後再搵Miss許囉!行啦!」都未等我答佢,佢就走咗出去。我一行出班房,阿希就講:「喂,不如一陣食三哥囉,你知唔知呀...」佢一見到我就一輪嘴咁講,玥雲就係走廊盡頭拎轉頭大嗌,「阿銘!行快啲啦!」阿希突然呆咗咁望著我:「Ching,快唔快咗啲啊你!一個上晝就...」「屌,唔好On9啦!一陣要同佢搵老師啊,啦啦聲食完返,聽日先同你食啦!」我一講完就雞咁腳咁走,後面就傳嚟佢把死人聲「得啦!明曬!記住安全至上呀!!!」 
  其實老實講,我係第一次單獨同一個唔熟異性食飯,開心得嚟但係又覺得好kick手,完全唔見同佢Up What。講真,一陣一定尷到傻!
 
  因為趕時間,所以就求其食老麥算。人一緊張,就容易派膠。我好地地開包茄汁都可以開到成身都係,件白色裇衫有一Pat Pat茄汁漬。真係柒到喊,今次嗰First Impression冇啦⋯⋯好彩,玥雲佢份人都幾多野講,咩到可以吹一餐,先令到我哋冇咁尷。原來佢之前讀3A,但係冇咩朋友,因為啲人都淨係識死讀書,好悶。
 
 「但係你唔係都有玩Drama同社咩?係學校出曬名風頭躉喎!冇朋友?唔信囉!」我用一個疑惑嘅眼神望著佢。佢一面不悅嘅樣咁講:「你知唔知邊個嘉穎?今年智社社長啊!上次同幾個男社職踩單車啫,佢係智社到唱到我係姣婆,免費雞咁,搞到我神憎鬼厭;係drama到係好啲嘅,但係Hi-bye Friend咁囉!之前無啦啦有個師兄搵我,但係傾咗幾日,又叫曬人BB豬,同佢好熟咩!咁你係咪仲覺得我好多Friend呢?見你個樣毒毒地咁,應該幾好人掛,你唔會介意我揀你做班長嘅!」佢講完之後,由唔開心嘅樣變返做一慣嘅眉開眼笑,就真係又嬲唔得落嘅! 
            
  之不過眼前呢一個樂天女孩,同時又係學霸,一個咁全能嘅人會冇朋友?我有所保留囉,一定係啲濕鳩收兵技巧啦!要我做兵?不了!  
 
已有 0 人追稿