《毒L和初戀相識的日子》: 第八章 投票

第八章 投票

Winnie傳來三則信息。
「男班長，今日唔記得傾添。開sem飯食咩要投票喇。我諗倒打邊爐，BBQ，同埋叫pizza外賣。你有冇其他提議？」(22:05)
「聽日可以break戈時投票。」(22:06)
「男班長咁早瞓咗？」(22:13)

我回覆番Winnie。
「Winnie，啱啱打完鋪機先睇倒電話。」(22:33)
「pizza外賣啱女仔食，另外戈兩樣好熱氣。」(22:33)


「一係聽日投票決定？」(22:34)

Winnie傳來兩則信息。
「好。我都覺得pizza係最好。」(22:39)
「聽日十半堂，一齊番？」(22:40)
其實呢句本應係我問。不過主動對於毒L嚟講完全係冇可能。

我回覆。
「好阿，九點市中心巴士站等ok?」(22:42)



Winnie傳來一則信息。
「ok, 聽日見~~~」(22:43)

翌日八點四十分，我已經企咗喺巴士站。約女仔，我唔可以遲到。

「男班長早晨。」

「早晨。」

Winnie今日着咗件黃色T-shirt, 好襯佢。



「做咩眼甘甘望住人？」Winnie啤住我問。

「我邊有？」

「哼，你話冇咪冇囉。」

之後Winnie戴起佢對無線耳機。

唔會咁就嬲咗我掛....

上到巴士，我地坐上層近車尾嘅一個孖位。

「Winnie, 我.. 妳.. 我..」



「你講咩話？」Winnie除低耳機問。

「妳今日好靚。」

痴線，點會爆咗呢句出嚟...

「多謝你。」Winnie報以一個好sweet嘅笑容。

「做咩咁口花花，唔似你啵。」

「讚吓妳姐~」

「算你啦。」

同Winnie一齊，原本45分鐘嘅車程都好似只係過咗5分鐘。



番到I大，今日係第三日番學。

「幾時先Day off...」晴晴頹問。

「仲有兩日，好快。」阿Paul回應。

今日呢堂係個中年Miss上，好快就放break。

「好，放廿分鐘break。」

我同Winnie出去白板前，同大家講開sem飯嘅事。

「梁sir話請我地全班食開sem飯。我同男班長提議BBQ, 打邊爐同埋pizza外賣，你地有冇其他提議？」



「日式放題！」一個肥仔喺位上大叫出嚟。

「好，有冇其他？」我問。

「冇就開始投票，每人一票，包括我同女班長。最高得票就揀戈樣，唔洗過半數。」 我對全班講。

「BBQ嘅舉手。」Winnie問。
「5個。」我數完之後回應。

「打邊爐嘅舉手。」
「8個。」

「日式放題嘅舉手。」
「1個。」



「最後，pizza外賣嘅舉手。」
「15個。」

包括我同Winnie。

共29票，因為有一個人走咗堂。

「好，結果就決定係pizza外賣。」我對全班講。

而呢個時候Winnie面露笑容。






幸好得到妳想要嘅結果。