《毒L和初戀相識的日子》: 第四十五章 情侶冷戰

第四十五章 情侶冷戰

「阿Paul好似同晴晴冷戰緊。」阿俊同我地講。

「吓，發生咩事？」我驚訝地問。

「聽講係阿Paul做錯嘢。」阿俊回應。

「晴晴今日都冇番，佢又冇同我講喎。」Winnie回應。



「幾時發生㗎？」我問。

「應該係琴晚嘅事，都係Jenny同我講。」阿俊回應。

「咁我一陣信息問吓晴晴，而你地就去搵吓阿Paul啦，好唔好？」Winnie問。

「ok!」

之後我地練習Speaking，經過Winnie上個星期同我惡補之後，我啲英文已經進步咗好多。



到落堂之後，我同阿俊跟咗阿Paul入廁所，嘗試了解發生咩事。

「你同晴晴鬧咗交？」我問。

「係呀，佢都唔講道理嘅。」阿Paul回應。

「發生咩事呀？」我問。

「琴晚同晴晴去大埔超級城行街，佢去廁所，我喺出面等。期間，我撞倒個中學同學，女仔嚟嘅，咪同佢傾一陣計。我地有講有笑，之後晴晴出嚟見倒就嬲爆爆走咗去。之後仲唔聽我電話。你地話我錯喺邊？」阿Paul向我地訴苦。



「我好明白你嘅心情，女仔係小器啲。」阿俊感同身受地回應。

「我都唔覺你有咩錯。不過，你諗住點做？」我問阿Paul。

「冇理由要我認錯掛。」阿Paul回應。

「但係你係男仔嚟，要主動氹番女仔架喎，無論你有冇錯都好。」阿俊回應。

「唉，我唔知，我番去先算。」阿Paul回應。

未拍過拖嘅我都比唔倒啲咩建議阿Paul。

之後，阿Paul自己走，而阿俊就同Jenny一齊走，而Winnie就等埋我一齊走。喺行去巴士站嘅路程同車程上，我講番我地同阿Paul嘅對話。

「其實好小事姐。」我話。



「男班長，你未拍過拖唔知姐。對女仔嚟講就好大件事喇。不過我相信佢地好快會和好如初。」Winnie回應。

「你又知？」

明明妳都未拍過拖...

「拿，你唔好同阿Paul講阿。啱啱Whatsapp咗晴晴傾咗陣，佢話只要阿Paul認錯就原諒佢。」

「咁就好喇。好彩我冇呢啲煩惱啫。」我回應。

「乜你唔想拍拖咩？」Winnie突然問。

呢個問題，好高深。








冷戰過後，關係會更好。