《毒L和初戀相識的日子》: 第六十二章 會話考試

第六十二章 會話考試

今日係星期五，係英文Speaking考試嘅日子。呢個考試事先已經知同邊個一組，我係同Winnie同埋阿俊嘅。今日考完之後，就代表sem break要開始喇，直到一月頭考試之前都放假。

我地係三點鐘戈組，要早十五分鐘報到，不過我地一點鐘左右已經番到I大，約咗阿俊同Jenny喺canteen食嘢。

「一陣靠你地喇！」阿俊同我地講。

「我地三個啲英文都冇問題嘅。」Winnie回應。



「妳啲組員都ok嘛？」Winnie問Jenny。

「一般般啦，希望佢地唔好累咗我啦。」Jenny回應。

話咁快已經夠鐘，我地三個上咗班房出面等，心情有啲緊張。

入到去之後，見倒入面有個鏡頭，影住三張凳。我地準備完之後，就正式開始喇。

討論嘅過程主要都係Winnie帶住我同阿俊，最後我地講淨二十秒。Timer響完，個Miss熄咗部攝影機之後我地就出番去喇。



「你地都講得幾好吖。」Winnie對我地講。

「好彩妳帶住我地昨。」阿俊回應。

「係囉。」我點頭回應。

「邊係吖，你地自己都有努力嘛。」

係嘅，好彩之前有妳幫我惡補昨。



「總之多謝妳啦。唔阻你地喇，我等埋Jenny先走呀。」阿俊對我地講。

講到好似我同Winnie已經一齊咗咁。

「好啦，拜拜。」

我同Winnie一齊走。今日佢要去廣華醫院探佢婆婆，由於佢有親戚喺醫院度，本來想提出同佢一齊去嘅念頭都打消咗。

「咁你自己番去喇喎。」Winnie喺沙田火車站出面同我講。

「咁下星期四見啦。」我對Winnie講。

「嗯，咁拜拜喇。」

「拜拜。」








下星期四，我有預感將會係好精彩嘅一日。