《毒L和初戀相識的日子》: 第一百三十章 害怕

第一百三十章 害怕

我搭的士到咗機場，入到一號客運大樓。我周圍搵，周圍睇，都唔見Winnie。我搵咗三個鐘，都搵唔倒。於是，我坐咗喺張凳度。

電話有好多個信息，嚟自好多人，有阿Paul、阿俊、晴晴、Jenny同Zoe等等，都係安慰我嘅。不過，就係冇Winnie份。

原來Winnie喺ig po咗一張喺離境大堂影嘅相，寫住:「goodbye HK, goodbye all my love...」

我失望咁行番去搭機場巴士番屋企。點解一定要離別呢？



曾經我有一刻諗過，會唔會係Winnie喺愚人節同我開嘅玩笑呢？不過，現實總係唔如意嘅。

到星期一番到I大，我一副頹樣，冇剃鬚冇梳頭咁番去。一入班房，佢地都行埋嚟關心我。

「Joseph哥，唔好咁啦，今晚請你去食好嘢喇。」阿Paul對我講。

「Joseph，人地都唔想見倒你咁㗎。」阿俊講。

「唔開心要同我地講呀，我地個個都會幫你。」晴晴講。



「係呀，唔好諗埋一邊呀。」Jenny講。

其實我仲好中意Winnie，好驚以後都見唔到佢。不過為咗令大家放心，我對佢哋講:「放心喎，我冇事，Winnie留咗封信畀我，我都明白嘅，我冇嘢呀。只不過需要啲時間去平復心情啫。」

「冇嘢就好。我都明你需要時間， 不過如果真係有啲咩唔開心呢，記得要搵我哋呀，我哋永遠都會喺你身邊，唔會離開你㗎。」晴晴回應，眾人也點頭。

「嗯， 咁上堂先啦，阿sir入咗嚟啦。」我回應。

冇咗Winnie坐喺隔離，上堂多咗一份孤獨感，非常唔習慣。明明佢上個禮拜都仲喺我身邊，話走就走，我真係好失望。



放學之後我中學同學Leo主動搵我食飯。我喺琴日曾經將呢件事同佢講。

「喂，你冇嘢吖嘛？」Leo一見面就咁同我講。

「點會冇嘢呀... 如果發生喺你身上你會點吖...」我回應。

「你仲好鍾意人哋呀？」Leo問。

「梗係啦，佢上個禮拜五都仲喺我身邊㗎。話走就走，得番我一個喺香港。」

「其實你有冇諗過搭飛機去英國搵番人哋呢？」

「係喎，點解我諗唔起嘅... 不過，我冇佢個地址喎... 同埋我都冇咁多錢買機票啦。」

「你可以問吓佢啲朋友，應該會有留地址畀佢哋嘅我覺得。仲有，來回機票應該一萬蚊左右啦，你有需要我可以借畀你。」



「好多謝你呀我會試下㗎喇。」

我好感動，Leo真係一個好好嘅兄弟。





我真係好驚以後都會見唔到Winnie。