《毒L和初戀相識的日子》: 第一百三十二章 難忘的生日

第一百三十二章 難忘的生日

轉眼間今日係我生日嘅日子，六月十號。阿Paul、晴晴、阿俊、Jenny、Christy、家怡同埋阿文都有同我慶祝。我地去咗食韓燒同埋唱通宵K。

我地夜晚戈陣去咗旺角嘅一間韓燒店度食嘢，阿Paul坐喺我隔離。

「Joseph哥，洗唔洗介紹個女仔比你識呀~？」阿Paul問我。

「你唔好玩啦。」我無奈地回應。



佢地好有我心，都有準備生日禮物比我。

阿Paul同晴晴嘅禮物係一個鎖匙扣，阿俊同Jenny嘅禮物係一個小擺設。阿文同家怡、同埋Christy 嘅禮物係包住咗嘅，我番去先拆嚟睇。

我地食嘢食到中途，阿文突然話有嘢宣布。

「我有啲嘢想同大家講。我同家怡... 正式喺埋一齊喇~」阿文有點害羞咁捉住家怡隻手講。

家怡亦都有啲難為情。



「恭喜你地呀~」晴晴回應。

「你地終於一齊喇~」阿Paul回應。

「恭喜哂~」阿俊回應。

「恭喜你地」Jenny回應。

「話咗你地有啲嘢㗎啦~」Christy回應。



而我都戥佢哋開心。

食完韓燒之後，我地喺條街行。期間經過登打士街，Winnie朋友個家姐開嘅樓上cafe嘅戈幢大廈。

一幕幕畫面又再喺我腦海中浮現，只可惜時間係番唔倒轉頭嘅。

之後我地去唱K，阿Paul叫咗半打啤酒比我地飲。唱到大約凌晨三點半戈陣，阿Paul又飲醉咗。

晴晴、Christy、家怡同阿文call咗㗎的士送阿Paul番去，而我都走喇，得番阿俊同Jenny留低唱到天光。

我搭通宵小巴番去，上車之後戴住耳機、聽住歌。

幾個月之前仲諗住生日可以同妳過，點估倒會發生件咁嘅事吖。

番到去之後，我拆開阿文同家怡份禮物，原來係一個喺外國買嘅指甲鉗。至於Christy戈份禮物係一個主要用嚟放卡嘅銀包。



收倒咁多禮物，我都覺得有啲驚喜同埋好多謝佢地。

瞓覺之前，我拎番Winnie提早送比我嘅生日禮物出嚟睇，即係粉紅色頸巾。我回憶番一啲往事，不知不覺就瞓着咗喇。





今晚我好開心，亦都好難忘，因為有一班朋友同我慶祝生日。不過，始終有啲嘢難以釋懷。