《毒L和初戀相識的日子》: 第一百三十七章 信任

第一百三十七章 信任

戈對男女係情侶嚟，佢地越鬧越激烈。

「咁我地分手囉，你都唔信我㗎啦！」個女仔激動地講。

「好呀，分咪分囉，我都忍咗妳好耐喇！」個男仔激動地大叫。

然後，個男仔就跑走咗，而個女仔就喊哂口咁向我呢個方向行嚟。



我聽倒佢地似係因為個女仔同其他男仔行得好埋，而個男仔唔中意，所以就嘈起上嚟喇。

今次係我第一次親眼喺街見倒一對情侶鬧交。諗番之前，我同Winnie好似都冇鬧過交。

我一路行去搭車，諗番起除夕戈晚同Winnie睇嘅戈套戲。

上年除夕夜，同Winnie一齊去睇電影《紀念日》，套戲特別嘅地方係方力申同埋鄧麗欣交往十週年嘅作品。呢套係呢個系列嘅第四套電影。現實中，佢地係因為呢個系列嘅電影而喺埋一齊。

可惜，今年三月嘅時候傳出咗佢地分手嘅消息。至於分手嘅原因，有好多種嘅講法，真正嘅原因要佢地先知。一對喺埋一齊十年嘅情侶都要面對分手嘅下場，實在係一件令人惋惜嘅事。



我覺得兩個人喺埋一齊，信任同忍耐係好重要嘅一樣嘢。如果雙方都冇信任，條路又點會行得長呢？雙方之間了解大家、信任大家，先會行得長久。例如啱啱鬧交戈對情侶咁，女仔難免要同其他男仔相處，咁男方係應該比足夠嘅信任女方。

至於忍耐，《紀念日》入面方力申曾經咁樣講過:「我愛妳，用把口講，好易㗎咋，邊個唔識吖。但係我忍妳，係要做㗎。」兩個人一齊，難免都會有啲唔夾嘅地方。呢個時候，雙方嘅忍耐係好重要。兩個人互相遷就對方，先會行得長久。

雖然我同Winnie相距好遠，不過我地隔日都會開Skype傾計。唔知點解，每次同佢傾計都有無盡嘅話題。早兩日佢話佢喺英國已經準備好番學喇，九月中就開學，同埋佢話十二月尾放假可能會番嚟香港過。

番到屋企地下大堂，我戈層部Lift維修緊。於是我搭隔離部Lift喺九樓出，出Lift之後見倒Winnie間屋已經租咗比人住，門口放咗幾對鞋。我不禁嘆咗一聲氣，再沿樓梯行番上去。

番到屋企，我準時坐喺電腦前同Winnie傾計。其實，兩個人相隔咁遠都可以保持聯絡，已經好難得。



喺下次見面之前，我都要好努力咁生活落去。






信任，係情侶間不可或缺嘅嘢。