《毒L和初戀相識的日子》: 第一百四十二章 拒絕

第一百四十二章 拒絕

Year 2 Sem One開咗學已經兩個月，嚟到十一月。晴晴之前提議一班人去BBQ。我地約咗十一月十二號去大尾篤燒嘢食同踩單車。

至於我同Winnie，佢九月中開學之後好忙，我地Skype嘅次數由隔日漸漸減少至每星期兩、三日。不過，我地每日都仲有keep住Whatsapp。

我間房張電腦枱依然放住同Winnie喺摩天輪嘅合照，仲有佢寄比我嘅幾張名信片。我每日都會見倒。另外，Winnie送比我條粉紅色頸巾我仲未有機會用倒，始終香港嘅天氣太熱喇。

今日係十一月十二號，我地約咗十一點喺大埔墟街市等。今次出席嘅人包括阿Paul、晴晴、阿俊、Jenny、David、Zoe、家怡同埋Christy。



我地買齊BBQ嘅嘢，大約十一點九就搭巴士入大尾篤喇。我地坐咗上層，我同咗阿俊坐。

「Christy仲有冇煩你呀？」阿俊問。

是咁的，自從戈次送咗Christy番屋企之後，佢就一直想接近我。例如主動提出做女班長啦。仲有，佢事無大小都Whatsapp我，什至會遊說我唔好再搵Winnie，話咩Long D冇幸福，令到我覺得好煩。

更爆嘅係，佢竟然問我覺得同佢有冇可能。當然，佢條件唔係差，不過我已經有女朋友喇，諗都唔會諗。

於是，我同佢講咗一句說話之後，佢就冇再煩我喇。而戈句說話就係: 「Sorry呀，我個心淨係得王泳琪一個。」



「冇喇，講完戈句之後我諗佢都明啦。」我回應番阿俊。

「咁就好喇。係呢，你下個sem想去邊度實習？」

每個I大HD學生都要完成實習先比畢業。

「未諗呀，到時先算啦。」

「我都未諗。」



我地終於到咗大尾篤。大家都興高釆烈咁行去燒烤場。我同阿Paul、阿俊透着爐之後就開始燒嘢食喇。

燒咗一段時間之後，我同David、Zoe、阿俊同Jenny一齊去租單車踩，而另外嘅人就繼續BBQ。

喺行去租單車嘅期間，Zoe主動搵我講嘢。

「你同Winnie點呀？」Zoe問。

「都係咁啦，每日都keep住聯絡。」

「其實你會唔會介意㗎，始終你地見唔倒面。」

「我緊係想見倒佢啦，不過我唔會介意嘅，我會等我同佢重遇嘅一日。」

「你地加油啦~」



租完單車之後，我地踩咗上水壩，亦即係船灣淡水湖。戈度嘅景色都幾靚，我地五個人一齊影咗幾張合照。

然後，我地慢慢踩到去水壩嘅盡頭，再調頭番去。

呢度以平路為主，好適合一啲單車初學者。可惜Winnie唔喺香港，如果唔係今日我就可以載住佢同埋教吓佢踩。

之後我地去還車，再join番佢地BBQ。當燒完野食戈陣，晴晴準備咗一個遊戲:狼人殺。




有時候，適當的拒絕，是無可避免的。