我地求其搵咗個位坐低咗,嗌咗嘢食之後,好死唔死俾班同班嘅八婆見到我同愛盈食飯,佢地嘅其中一個,懶係熟咁痴埋嚟問我地,

「喂喂,你哋兩個做乜一齊食飯嘅?幾時一齊架?幾時請食出pool飯呀?」

係一個望落幾清純嘅女仔,而且應該係運動型,身形都算係女神級,應該有唔少人追。

「一齊食餐飯有咩問題?你係佢阿媽?咁關心佢?」對住佢呢啲麻煩嘅問題,我選擇以冰冷嘅聲線反問返佢。

「車...問下姐!洗唔洗咁樣窒住晒呀...」講完呢句之後佢就好尷尬咁樣返位食嘢,我望一望愛盈,只見佢塊臉好似有啲紅。



...唔通佢發燒?睇黎一陣要買返啲感冒藥...

我望佢塊臉唔小心就望到入咗神,因為實在太靚,白裡透紅嘅臉頰,加上佢無比迷人嘅五官,我塊臉好似有少少熱...

「做...做乜係咁望住我呀...」佢發現到我嘅目光之後,塊臉紅到好似番茄咁望住我。

「無...你塊面做乜咁紅?唔舒服?」我移開視線講。

「唔...唔係呀快啲食嘢啦,我想返屋企喇!」



食完嘢之後我哋就去咗配鎖匙,全程都見唔到一個熟人,跟住我哋就搭車返去,結果去到巴士站又見到頭先個八婆係度等車,佢見到我哋之後又過嚟「關心」我哋。

「喂~返去都一齊,你哋兩個果然係有嘢,唔係同居埋添呀嘛?」我選擇無視佢嘅問題,雖然後者係事實...

「黃愛盈,你唔係話你阿媽叫你快啲番去咩。我都有嘢做,不如一齊飛的?」

我一路講一路同佢打眼色。

「係...係喎...我都差啲唔記得咗添,咁我哋走先喇瑩瑩。」



我都係而家先知個八婆叫瑩瑩,之後我哋就係隔離截咗架的士,上咗的士之後愛盈就用佢楚楚可憐嘅雙眼望住我。

「點解我哋要避佢哋嘅?」佢用一把好可愛嘅聲線問我。

「因為佢哋好煩,問呢樣又問嗰樣」我照直回答。

「咁你覺得我煩唔煩呀?」佢繼續望住我,眼神好似有啲緊張。

「唔覺...」佢咁樣望住我令我有啲唔好意思。

「咁就好喇...」佢用一把細聲到正常人都聽唔到嘅聲講,但係我天生聽力就特別好,令我成日懷疑我前世係咪貓或者狗...

「咁我哋之後要點答佢我哋係咩關係呀?」佢望住前面講。

「你想點答?我唔介意你話我哋係情侶關係」, 我淺淺笑道。



...我都唔知點解我會咁大膽講呢啲嘢,但係腦入面自動彈咗呢句嘢出嚟。

「痴...痴線架你都...你就想呀你!」講完呢句嘢之後佢就淨係望住出面,無望過我,但我都隱約見到佢塊面又有啲泛紅,好彩啱啱買咗盒感冒藥。

之後我哋成程都無再講過嘢,不過好快就到咗樓下,我俾咗錢之後愛盈就率先衝出去撳𨋢,上到去佢又急急腳行去門口叫我快啲開門。

明明自己都有鎖匙...