諗得太多野...個肚又開始痛

...我啲藥...全部都唔記得拎過黎...真係麻煩...唯有食住袋入面果啲舊嘅藥先啦...雖然啲副作用好勁...睇黎聽日又要請假...結果病嗰個真係我。

啲野食到咗之後,愛盈就九秒九咁係間房到衝咗出黎,我地兩個人嗌咗三盒飯(愛盈兩盒),結果我無乜胃口,淨係食咗半盒飯,跟住愛盈就拎咗我嗰半盒食埋佢,

「你咁食得嘅咩」,明明佢又瘦又細粒...

「唔係呀,係通常夜晚胃口特別好啫」





睇黎唔可以成日都請佢食嘢...

「係喇,我聽日應該唔返學」

「吓...點解嘅...」,佢個樣望落好似有啲失望。

「我...聽日有嘢要做」

「哦~咁你聽日幾點起身,我驚...起唔到身...」





原来係擔心起唔到身...

「無所謂,我同平時一樣,聽日如無意外會叫醒你」

「好呀!咁唔該曬先喇,咁我就幫手執垃圾當報答你啦」,佢開朗咁講。

傾咗陣計之後,我就返咗房做嘢,唔記得咗講,我除咗係學生之外仲係一位網絡小說作者,所以平均每個月都可以有三四千蚊,所以如無意外嘅話,我畢業之後嘅目標應該都係作家,希望可以快啲有機會出書。

出完今晚果篇文之後我都有少少眼瞓,所以睇咗陣書睇到十二點就去咗訓覺。





第二朝六點我就起咗身,話說係呢間屋都訓得幾舒服,黎左咁耐都無靈體入過嚟,因為我有少少靈異體質,所以可以感覺到靈體。

梳洗完之後都六點半,之後我就去探熱,果然發緊燒...

但我始終都係去咗煎啲腸仔同炒啲蛋再叫醒咗愛盈,結果今日都係搞到七點半先出門口,我同佢一齊去咗巴士站,但係我哋係搭唔同車,因為我要返老母果邊拎藥。

大概七點十我就到咗舊屋,老母唔係屋企...

應該係去咗送細佬返學,所以我入去我攞返啲藥之後就返咗去,返到去之後都八點半。

我食咗粒退燒藥之後就訓咗陣,大概十點就醒咗,之後打文打到十二點,其實黃愛盈唔係到都...幾悶,感覺好似冇人煩住我,反而有啲唔習慣,而且好似少咗個目標咁,明明只係一齊住咗兩日。

整咗啲嘢食之後我就落咗樓下打咗陣波,打完波返到去沖完涼都三點九,愛盈佢起碼四點先返到...