《突然有條女同我同居》(冇甜): 7

「喂～有無人呀～～帶我番屋企啦～～免費架～」

咩聲...呢個公園入面明明咩人都無...我聽到呢啲聲之後企咗起身，向發出聲音嘅方向望咗一望，只見地上有一個紙箱，我出於好奇心行咗過去，望入個紙箱，見到一隻全黑嘅貓，佢望住我講，

「喂！喂你啊！帶我走呀！我兩日無食嘢喇！你屋企最好同我有啲好食嘅罐罐呀！」

我下意識咁抬頭向周圍望咗一望，周圍仍然係咩人都無，

「喂...點解你識講嘢嘅...」



「點解你聽得明我講嘢嘅？！點解人類識聽我講嘢嘅！？？」

呢個時候我隻腳嘅旁邊碌咗一粒波過嚟，之後過多幾秒就有隻狗一路講嘢一路執佢主人掉過嚟嘅波，

「好攰呀...但係見到粒波就想咬...好肚餓喇我已經...」

點解...我會聽到動物嘅聲音...

「喂小心啲啦死蠢，你爭啲就踩到我喇！」



我望向地下，竟然係一隻螞蟻同我講緊嘢...

我拎起個紙箱，將佢放喺長凳上面諗住冷靜下。

我而家諗到嘅唯一可能性，就係我有超能力，但係...點解我嘅超能力會廢到咁嘅...正常嘅主角嘅超能力唔係應該係瞬間移動或者係時間暫停果啲嘅咩...同動物溝通有咩用呀...仲有呢個唔係愛情故嚟嘅咩？

雖然我接受唔到呢個咁廢嘅超能力，但係我好快就冷靜咗，而且可以同動物講嘢其實都幾有趣呀...

「我有嘢食未呀...好肚餓呀...我想食罐罐...」



「我再過多一陣就會帶你番去架喇，如果你無家可歸嘅話以後住係我屋企都無問題，同埋你有冇名？」

「我之前嘅主人無幫我改過名，同埋我唔係幾好意思咁樣麻煩你...」

「點會麻煩我呀...仲有等我幫你改個名啦，你係男仔...咁嘅話就叫.....憶奇啦...」

係呢個時候，愛盈send咗條msg嚟，

盈－你番得嚟喇～螢螢佢啱啱走咗喇～

－Ok

之後我就入咗屋企樓下等lift，因為我去嘅公園其實就係屋企樓下，部lift嚟到果陣，我竟然同螢螢撞到正一正，但係好彩佢講緊電話完全留意唔到我，唔係嘅話我又要比佢問呢樣問果樣，上去個陣憶奇又同我講嘢，

「我咁樣都係唔係幾好...我聽日都係自己出番去生活啦...」



「你.....」

轉眼間就番到門口，入到去之後我就見到愛盈行過嚟，雙眼發曬光咁望住憶奇。

「嘩～～係貓貓呀～～好得意呀～～攬攬～～」

憶奇喵咗幾聲，係正常人嘅耳中係十分可愛嘅叫聲，但實際上其實係咁樣...

「嘻嘻嘻～我都係決定麻煩曬你好啲喇～」

你隻死嘢...

「咦貓貓你啲肉球點解咁污糟嘅？等我幫你沖個靚涼啦～」，黃愛盈抱走憶奇，急急腳咁行入廁所。



「喵～喵嗚呀！汪！」（唔好！冷靜！你冷靜下先！呀！！！），憶奇撕心裂肺咁求救。

...汪？

睇嚟呢個屋企以後都無得靜喇...