我慢慢咁打開個箱...望入去,見到嘅係一隻...貓?

同憶奇正正相反,佢全身都係白色,仲要係純白果隻,見到佢之後佢無任何特別大嘅反應,只係凝視住我,但係佢俾我嘅感覺唔係警戒,係一種無助,孤獨嘅眼神,雖然屋企已經有憶奇係到,但係...我都係唔可能就咁掉佢係到,交俾果兩條友...

我始終都係唔放心,兩個連自己生活都唔係幾照顧到嘅人,又點照顧好一隻貓呢...

咁唯有就等我黎照顧好佢啦,而且俾憶奇識個朋友都唔錯...

「點解你會係到嘅?」





「...」

佢無出到聲,只係用兩隻水汪汪嘅眼睛凝視住我...

「你唔想講?定係你...唔識講?」

佢聽到之後好似想同我表達某啲野咁,將視線轉移到佢嘅腳底。

我望向佢嘅腳底,有一張卡片,上面寫住,





「不想養了,啞貓,貓女,一歲,見到執就佢,無電話留低,生定死唔關我事」

究竟係幾無責任心嘅人先會咁樣做...呢個世界真係咩人都有,不過好彩佢有留低一啲資料,一歲...即係細過憶奇少少...而且講唔到野...即係我嘅能力係佢身上完全用唔到。

不過...我已經決定咗要好好照顧佢,因為果種眼神,即使呢隻貓有缺陷,係佢離開世界之前我都要好好照顧佢。

「喂,龍,你地番去先定點。」

「我地同你番你屋企先啦緊係,廢事你又俾人襲擊呀!同埋你有錢養多隻貓咩?」,阿龍問道。





「錢呢啲野一啲都唔係問題。」

「既然你咁講...咁我就信你喇,但係呢...你今次想改咩名?不如我黎幫手啦!我覺得西瓜,雪糕,奶茶果啲名都唔錯呀!」,佢提議。

「名...憶雪。」

「果然係寫嘢嘅...」,阿峰出聲。

「你點知架?我都無同你地講過...」

「大鑊...」,佢細聲咁講。

「係你條女同我地講架,佢講果陣都不知幾自豪呀。」,阿龍回答

「愛盈...係喇...關於超能力嘅野絕對唔好同佢講,我驚佢會...」





「放心,我地好守得秘密,應該...」,佢拍一拍心口。

「希望你可以」

跟住我地就上番去屋企,送到門口之後阿龍順便接埋瑩瑩就走。

「嘩~又一隻貓貓!憶奇有朋友喇,但係佢點解咁靜嘅?」,愛盈雙眼發光。

「佢講唔到野,我見到之後唔忍心所以就帶咗佢番嚟」

「我有一個咁有愛心嘅男朋友真係好...」

佢攬到我實一實咁講。





之後我地就將憶雪擺係書房入面先,因為唔可以咁快俾佢地兩個見面住。

食完飯之後我就番房打下文,打打下憶奇就起身同我講野,

「你身上有第二隻貓嘅味。」

「我諗住養多隻貓,俾你識個朋友好唔好?」

「男定女。」,憶奇開始洗臉

「女黎,細過你。」

「咁無所謂。」,佢扮唔興奮。

之後佢就繼續訓,咁樣即係想點...





差唔多十一點左右,我地就訓咗覺,唔知點解今日好似特別攰咁。

進入夢境之後,我又去到咗果個籃球場,我一如既往咁用最低武力咁打開咗對上咗鎖門,出到去之後,我見到嘅又係屋企嘅門口,我諗番起上次嘅畫面...果個畫面,我唔要再見到,之後我打開對門,映入眼簾嘅係...