《突然有條女同我同居》(冇甜): 30

一出到嚟，愛盈就目不轉睛咁樣望住我，而且塊臉仲要紅過個番茄，

「你...你做乜唔著衫就走出嚟呀?!」

佢一路流口水一路面紅住咁講，

「我唔記得拎衫。」

講完之後我就番房拎番件衫，點知...



「咯嚓！」

「黃愛盈你影啲咩？」

我一路著番件衫一路講。

「好...好型...」

「過嚟。」



我以一個接近命令嘅語氣叫佢，佢亦都乖乖地咁行咗過嚟，好似驚俾我鬧咁。

佢行到過嚟之後我就將隻手擺喺佢個頭上面，

「沖涼。」

唔知點解佢聽到之後塊面好似變得更加紅，

「咁...咁心急嘅你...我...怕醜...」



唔知點解佢仲要越講越細聲。

「快啲拎衫，而家好夜喇。」

之後我就番番浴室吹頭，

佢亦都跟住我入咗嚟，

「你做乜吹頭嘅？唔係...咩咩？」

「...?我沖完咪到你沖囉。」

「吓...你...我嬲嬲！哼！」

之後佢就嘟住嘴咁入咗去，奇怪....不過其實佢嬲嘅樣都可愛...



之後我就番咗房睇下書諗住等埋佢就一齊瞓。

點知佢入到嚟之後，繼續鼓起兩邊臉頰咁推翻我出去，

「我今晚唔同你瞓！我同憶奇憶雪瞓！嬲你！哼！」

磅！！

講完仲要好大力咁閂咗門，企係門外嘅我只可以摸一摸後腦，思考我究竟做錯咗啲咩...

之後我就坐係梳化上面，拎部手機出嚟，再google－女友突然生氣的原因。

結果睇咗一個鐘都係睇唔明，所以我選擇咗瞓覺算，點知瞓瞓下突然諗到，唔通係嚟M？



咁聽日要迫佢飲多啲熱水...

結果第二朝，我突然感覺到感覺到身上有股壓力，令到我擘大眼，但係係我身上嘅竟然係愛盈，攬住我然後望住我望到實一實。

佢唔係嬲嘅咩...?

「你做乜...」

「我掛住你喇。」

佢甜笑住咁望住我講。

我亦淺淺一笑咁回答，

「唔係你趕我出嚟嘅咩？」



「我而家後悔。」

之後佢就痴得更加實。

「好喇，我要去整早餐喇，你今日都要記住飲多啲熱水呀」

「點解嘅？我都未嚟M。」

「吓...咁...你當我無講過啦...」

「嘻嘻～你其實都幾可愛吖希希～」

講完之後佢仲要搣咗我塊面一下...



食完早餐之後，門鐘聲就響起咗，咁早會係邊個...

打開門之後，我見到嘅...係阿龍佢哋，

「早晨！外賣！」，阿龍精神咁講

「你哋咁早過嚟做乜...」

「係屋企太悶無嘢做呀嘛。」，佢講到好似好有道理咁。

之後佢就好唔客氣咁入咗嚟，傾咗陣閒計之後，愛盈就話：

「不如我整個蛋糕呀？屋企仲有材料淨低。」

「唔好！」

換來嘅係其他三人異口同聲嘅反對聲，

「你俾下意見啦。」，佢哋三個望住我講，

「我都唔食蛋糕...」

講完之後我感覺到三人傳來嘅殺氣，

「不過都係唔好整好啲...」，我苦笑道。

「點解啫～」，愛盈用佢水汪汪嘅雙眼望住我。

「我...驚你整親...」，我竟然講咗個咁荒謬嘅理由...

「咁呀...我哋一齊整咪得囉～」