《突然有條女同我同居》(冇甜): 64

所有人準備好曬之後，鄧伸就準備開波。

「嗶！」，哨聲一響，鄧伸就望向程解顧，做出傳波嘅動作。

然而粒波並無離開佢隻手，佢做完假動作之後極速咁收返嚟起手！

「啪！」，我喺佢準備起手果陣拍走咗粒波，奪走球權。

「好慢。」，我望住眼神有啲詫異嘅鄧伸，用左手將粒波傳比右邊四十五度角嘅阿龍。



阿龍接到粒波之後，係一秒間就已經將粒波拋咗去籃框嘅左上方，亦係阿峰嘅上方。

「磅！」，阿峰輕鬆完成攻勢。

「又嚟...究竟佢哋係咪真係中學生嚟。」，在場有觀眾開始討論。

「仲以為會好勁...」，阿峰邊講邊企好防守。

再次獲得球權嘅鄧伸，再無好似一開始咁囂張，紮實咁張粒波交俾程解顧，然後上前單擋，隨後轉身切入禁區要波，程解顧住意到之後就用力咁傳粒波俾佢，然而一直跟住鄧伸嘅我，無可能會俾佢輕易咁完成到，所以我踏前一步伸手拍走粒波，而粒波啱啱好俾三分線外嘅阿龍接到，佢隨即快速而標準咁起手！



因為程解顧完全反應唔切，最後只能望住粒波伴隨住清脆嘅穿針聲進入籃網，比分5－0。

「連隻手都特別長，佢臂展會唔會有米九...」，我再次聽到觀眾討論我，無記錯嘅話我最近一次度好似係196...

「唔...唔緊要！慢慢打！」，鄧伸再次開波，今次程解顧跑到鄧伸嘅身後，接到波之後用鄧伸嘅身軀阻擋防守，順利起手！

籃球擦板，巧妙咁進入籃框，對手終於入咗佢哋嘅第一球波，但亦會係最後一球...

籃球落地後，阿峰即刻將佢傳返出嚟，我係左邊三分線外嘅 四十五度角接到之後直接起手，鄧伸快速上前嘗試阻擋我，然而我將起手點提高咗，所以依然無阻咁成功起手！



「八比三。」，係我講完後不出一秒，粒波就以完美嘅弧度進入籃框。

「勁到咁守條毛咩...」，我又聽到同一位觀眾係度討論我。

五分鐘後...比分已經去到18－3，只要再入多球三分就可以攞走冠軍，然而對手仍未放棄，越嚟越認真對待每一球。

係鄧伸打算再嚟多次頭先成功出手機戰術果陣，我提早拍走咗佢粒波，輕鬆奪得球權，我將粒波帶咗出三分線後望咗阿峰一眼，佢明白咗我嘅意思之後，敏捷咁跑到三分線外嘅左邊底角，我將粒波傳俾佢，佢接到之後用標準嘅姿勢出手，今集第一次出現嘅熊王男無預料到佢會咁做，最後只能白白望住冠軍離去。

「嗶!嗶～～」，裁判以哨聲宣佈比賽結束，雙手握手之後，主持人就直接出嚟宣佈賽果。

「好！先頒發季軍！恭喜『我要成為海賊王！』隊獲得季軍，獎品係三件隨機嘅NBA球員T恤！」

「跟住亞軍係『拎硬冠軍』隊！恭喜你哋獲得一箱嘅Gatorade能量飲品！」

「最後就係冠軍！就係葉正希，王許龍同埋文清峰嘅『好似未改』隊！恭喜獲得千五蚊現金同埋一對情侶鎖匙扣！」，大鑊...



「咦...個名好似有啲似曾相識喎...」，有觀眾講。

「等陣先！我知佢哋點解咁屈機喇...」，另一位觀眾嗌咗出嚟。

「學界第一嘅小前鋒兼分衞，控衛，同中鋒兼大前鋒...點樣輸呀...」，佢接住講。

「係度見到學界第一...感覺好夢幻呀！」

我哋係一陣吵鬧之下拎到獎品，然後準備離開。

返到去場邊，我直接著返果件已經充滿咗愛盈氣味嘅外套，反正頭先都無乜出到汗。

「黃愛盈，過一過嚟。」，我叫道，佢隨即心虛咁行埋嚟。



「送俾你。」，我笑住將鎖匙扣嘅其中一條送俾佢，鎖匙扣係佢最鐘意嘅動漫，One Piece入面一位角色嘅公仔。

「呢個係...」，佢接過鎖匙扣之後驚喜咁望住佢。

「路飛，你之前話過你好鐘意佢。」，我微微屈膝，令雙眼同佢係同一個高度上，然後燦笑。

「咁你果個呢？」，佢好似小朋友咁，既興奮又好奇咁問。

 「艾斯！」，我拎出自己嘅鎖匙扣。

「嘻！多謝～我真係好好好~鐘意呀！」，佢行前攬住我。

「遲啲我哋...一齊去搵埋薩波啦。」，我係佢耳邊講。

「嗯！」，佢攬得更加大力，我嘅身體亦因為佢而越嚟越溫暖。



「咔嚓！呀...唔記得熄聲添...」，螢螢慢慢咁收埋部電話，然後匿去阿龍身後。

「...一陣send比我。」，我微笑住講。

「好～食飯啦去！」，阿龍精力充沛咁講。

「咦...阿峰呢？」，阿龍提起佢。

「我想要女...我想要女...我好想要女呀...」，只見冇乜存在感嘅阿峰踎喺角落頭，用手指對住地下畫圈圈。

「叮！」， 阿峰部電話響起鈴聲了。

佢拎出嚟望一望，然後尖叫：「嘩!!!係女呀!!!女呀!!!」



「真係...」，我同阿龍同時搖頭苦笑道。