有一日，我住左入精神病院: 八、母女

我夾左滿滿一大盤嘅野食，開始搵位坐低大快朵頤。前面好似有一對母女喺度一齊食飯，望落正正常常咁，應該唔會介意我坐喺隔離掛。

「唔好意思，請問呢度有無人坐？」我問面向住我坐嘅女人。佢望落端莊大方，頭髮梳成一個整齊嘅髻，身上著住日系嘅白色雪紡衫同灰色紗裙，一啲都唔似精神病人。

「無啊無啊，得我同我個女咋。」

「妹妹幾大喇？」背向住我嘅女仔有一頭烏黑亮麗嘅頭髮，望落滑到好似洗頭水廣告嗰啲model咁。我忍唔住伸手，摸向佢呢把令人羨慕嘅頭髮。 

「哇！冧嘅？！」我嚇到成個人彈起，盤餸菜都跌曬落地。 





「喂啊！你㩒扁左我個女個頭喇！」

「你... 你個女... 女係咩黎架？」 

「咩咩黎呀！我個女咪我個女囉！」個女人一邊嗌，一邊攬實佢個「女」。

如果唔係幻覺嘅話，我頭先摸到嘅一定係一個吹氣公仔。嗰個觸感，簡直喺我腦入面揮之不去。 

我嚇到飯都顧唔上食，即刻爬返起身繼續向前跑。