二零五零年 – 我女神係暴徒: 第十九章

我記得好細個果陣, 老豆同阿媽經常嘈交, 而且我隱約記得老豆成日會郁手打阿媽, 所以阿媽成日夜晚都會入黎我間房入面攬住我喊, 陪我一齊訓教, 可能…因為佢唔想同阿爸訓。
 
阿媽果陣好堅持每晚都教我講廣東話, 老豆果時好反對因為佢成日都話未來只會用得著普通話。當阿媽唔係屋企果陣, 老豆有時會因為我講廣東話而打我一獲甘。
 
雖然老豆自己講普通話好爛, 但佢以前係屋企都會用好難聽得明既普通話同我講野, 直到老豆醒覺我根本聽唔明佢講乜, 佢先係屋企講番廣東話。
 
而因為我經常目睹老豆打阿媽, 我心底裡一直都好唔鍾意老豆。我為左想阿媽開心, 我好努力自己練習廣東話, 因為阿媽成日都同我講「識講廣東話先稱得上係真香港人」。
 
最後係我小學畢業果年, 阿媽就突然執晒野離開左呢個家, 但同時亦由果日開始老豆就無再打過我。
 


「啊…係呀, 我識講廣東話…Felix你…係喎! 你個年代當年母語都係廣東話…」
 
「熊主任…第一「此」聽到「李」講…「講」東話…」哇…迪儀都識?! 但佢既音怪怪地…
 
「迪儀你竟然都識講廣東話? 點解既? 我地以前讀書應該唔會教。」
 
「係我細佬教「禾」既…佢以「錢」好鍾意唱「講」東歌…」
 
頂唔順, 女神明明平時把聲好甜, 一講廣東話怪怪地。我轉番普通話頻道….
 


「迪儀…咁..咁…那迪輝就是因為唱了這首歌而被捕嗎? 但即使他唱了這歌…你說過他只是在學校的錄音房裡面唱啊…」
 
迪儀突然塊面黑黑地。
 
「迪輝”距”話...哎呀! 他告訴我…校長說過是有職員在閉路電視中聽到…就去武警那邊告密了…聽聞學校職員就是為了那數萬元的告密獎金…」
 
學校連自己既學生都篤灰?…為左幾萬蚊就可以出賣自己既學生? 真係教蓄…
 
咦?!…其實又有乜野出奇呢…之前果班 Y.M.老師係課室入面教學生D非官方批准既內容…都係因為閉路電視監聽到而被拘捕…篤灰文化根本已經係學校入面根深柢固…
 


「就因為在學校裡唱過一首歌…他就被關上十年了嗎…他被抓的時候都還沒成年...都還只是一個青年…」
 
「阿熊…當時政府用<<非緊急法>>將羈留時間無限伸延既時候, 同時授權左武警可以無視所有對未成年被捕者既保障, 審問果陣亦無需父母同律師在場。」
 
「熊主任…當時我第一次在羈留室探望迪輝時, 他的眼和臉都被打得面目全非了, 一隻手也骨折了…當時我立即就跟當值警官投訴, 但警官說沒有可疑…只是迪輝自己跌倒受傷…但迪輝一直被綁在坐椅上又如何跌倒呢…?!」
 
我望向Felix, 心情好沉重。
 
「國家已經打壓到年青人就算係學校範圍入面唱一首比較敏感既歌都犯法啦咩?」
 
「阿熊…連用隻眼啤住武警都算犯法既地方, 唱歌犯法好出奇咩??」